काठमाडौं । नबिल सेक्युरिटिज लिमिटेडले एनबिबिएल सेक्युरिटिज लिमिटेडलाई प्राप्ति गर्ने भएको छ । वैशाख २७ गते बसेको सेक्युरिटिजको सञ्चालक समितिको बैठकले एनबिबिएल सेक्युरिटिजलाई प्राप्ति गर्ने प्रस्तावसहित जेठ १२ गते विशेष साधारण सभा गर्ने निणर्य गरेको हो ।
नबिल सेक्युरिटिजले स्टक डिलरको लाइसेन्स प्राप्त गर्न नेपाल धितोपत्र बोर्डबाट आशयपत्र पाइसकेको छ । पछिल्लो समय बोर्डले तीन किसिमका ब्रोकर लाइसेन्स वितरण गर्ने तयारी गरिरहँदा रू. १ अर्ब ५० करोड पूँजी कायम गर्दै नबिल सेक्युरिटिजले मात्र स्टक डिलर सञ्चालका लागि आवेदन दिएको थियो ।
नबिल सेक्युरिटिजले ६ महिनाभित्र आवश्यक पूर्वाधार तयार गरी बोर्डलाई जानकारी गराउनेछ । बोर्डले कम्पनीले तयार गरेको पूर्वाधार अनुगमनपश्चात् चित्त बुझेमा कारोबारका लागि अन्तिम स्वीकृति प्रदान गर्नेछ ।
यसअघि स्टक डिलरको रूपमा नागरिक स्टक डिलरले बोर्डबाट लाइसेन्स प्राप्त गरेको थियो । दोस्रो स्टक डिलरका रूपमा नबिल सेक्युरिटिज सञ्चालनमा आउनेछ । यसअघिको स्टक डिलरले बजारमा सोचअनुसारको काम नगरेको गुनासो चलिरहँदा नबिल सेक्युरिटिजको प्रवेशपछि दुवै कम्पनी प्रतिस्पर्धी रूपमा अघि बढ्नेमा लगानीकर्ता आशावादी देखिएका छन् ।
बोर्डले बैंकका सहायक कम्पनीहरूलाई ब्रोकर लाइसेन्स वितरण गर्ने व्यवस्था लागू गरेसँगै साबिक नेपाल बंगलादेश बैंकको सहायक कम्पनीको रूपमा एनबिबिएल सेक्युरिटिज कम्पनी रजिष्ट्रारको कार्यालयमा दर्ता भएको थियो । एनबिबिएल सेक्युरिटिजले भने ब्रोकर लाइसेन्सको लागि आवेदन दिएको छैन । नबिल सेक्युरिटिजले एनबिबिएल सेक्युरिटिजलाई समान हैसियतमा प्राप्ति गर्न लागेको हो । एनबिबिएल सेक्युरिटिजले पनि जेठ १२ गते नै विशेष साधारण सभामार्फत प्राप्तिसम्बन्धी प्रस्ताव पारित गर्दै छ ।
दुवै कम्पनीको विशेष साधारणसभामार्फत प्राप्तिको लागि हालसम्म भएका कार्य अनुमोदन गर्ने, डीडीए प्रतिवेदन पारित गर्नुका साथै आगामी दिनमा प्राप्तिको लागि आवश्यक सम्पूणर् काम गर्ने जिम्मेवारी सञ्चालक समितिलाई दिने निणर्यसमेत गर्नेछ ।
