गिरीप्रसाद बुढा/मुसिकोट ।
राष्ट्रिय जनमोर्चा रुकुम पश्चिमको आयोजनामा रुकुम जिल्लाको त्रिवेणी गाउँपालिकामा सञ्चालित घरदैलो तथा जनभेटघाट कार्यक्रमअन्तर्गत तेस्रो दिन माघ २६ गत सिम्रुतु बजारमा कोणसभाको कार्यक्रम सम्पन्न भएको छ ।
राष्ट्रियता, गणतन्त्र र धर्म निरपेक्षताको रक्षा गरौँ, ओली सरकारको असंवैधानिक कदम, भ्रष्टाचार र सङ्घीयताको विरोध गरौँ मूल नाराको साथ सम्पन्न उक्त कोणसभामा राष्ट्रिय जनमोर्चाका केन्द्रीय सदस्य तथा कर्णाली प्रदेश इन्चार्ज रत्नविक्रम राना प्यासी र राष्ट्रिय जनमोर्चा रुकुम पश्चिमका अध्यक्ष गिरीप्रसाद बुढाले मन्तब्य राख्नुभएको थियो ।
मन्तव्यको क्रममा बोल्दै वक्ता रत्नविक्रम राना प्यासीले वर्तमान ओली सरकारको असंवैधानिक कदम तथा प्रतिगमन नसच्चिएमा संयुक्त आन्दोलनको आँधीबेहरी सिर्जना गर्नुपर्ने आवश्यकता रहेको कुरा व्यक्त गर्दै सङ्घीयताको खारेजी तथा राष्ट्रियता, गणतन्त्र, र धर्म निरपेक्षताको रक्षाका लागि सबै एकजुट हुन आह्वान गर्नुभएको थियो ।
जनभेटघाट तथा पर्चा वितरणपश्चात् सम्पन्न कोणसभामा राष्ट्रिय जनमोर्चा रुकुम पश्चिमका सचिव खड्कसिं खड्का तथा उपाध्यक्ष तुलबहादुर खत्रीको समेत आतिथ्यता रहेको थियो ।
