राधी विद्युत् कम्पनीको शेयरमूल्य ९.९८ % ले वृद्धि, प्रतिकित्ता रू. १२२३ पुग्यो

असार ९, काठमाडौं । साताको चौथो कारोबार दिन बुधवार पनि राधी विद्युत् कम्पनीको शेयरमूल्य अघिल्लो कारोबार दिनको तुलनामा ९ दशमलव ९८ प्रतिशतले वृद्धि भएको छ । यो समाचार तयार पार्दाको समय १२ : २७ बजेसम्ममा कम्पनीको शेयरमूल्य प्रतिकित्ता रू. १ हजार २२३ पुगेको छ । कम्पनीको शेयरमा विक्रेताभन्दा क्रेता धेरै भएकाले शेयरमूल्य बढेको हो ।  मार्केट डेप्थमा हेर्दा ६७ हजार ९३७ कित्ता शेयर खरीद माग रहेको छ भने विक्री अर्डर ६८ कित्ता मात्र रहेको छ । कम्पनीले बोनस शेयर र हकप्रद शेयर पारित गर्नका लागि साधारण सभाको मिति तय गरेसँगै लगानीकर्ताको आकर्षण बढेको हो । कम्पनीले ३६ दशमलव ५ प्रतिशत बोनस शेयर वितरण गर्ने प्रस्ताव गरेको छ । सो बोनस शेयर वितरण पछि कायम हुने चुक्तापूँजीको १४७ दशमलव ४२ प्रतिशत हकप्रद शेयर निष्कासन गर्ने प्रस्ताव गरेको छ । यी दुबै प्रस्ताव गर्नका पारितका लागि कम्पनीले आगामी असार २९ गते साधारण सभा बोलाएको छ ।