जेठ ३, चितवन । आन्तरिक राजस्व कार्यालय भरतपुरले चालू आर्थिक वर्ष ०७७ /०७८ को वैशाख महीनामा लक्ष्यभन्दा कम राजस्व असुली गरेको छ ।
कोरोना संक्रमणका कारण वैशाख महीनाको दोस्रो सातादेखि निषेधाज्ञा लागू गरिएपछि यसको असर राजस्व असुलीमा परेको हो । उक्त महीनामा २ अर्ब ३३ करोड ७ लाख रुपैयाँ लक्ष्य रहेपछि उक्त कार्यालयले १ अर्ब ८९ करोड २३ लाख १२ हजार रुपैयाँ राजस्व असुल गरेको हो । जसअनुसार कार्यालयको राजस्व असुली सबै शिर्षकमा गरी १५ दशमलव १७ प्रतिशत कम भएको छ ।
कार्यालयले वैशाख महीनामा सबै शिर्षकमध्ये सवैभन्दा बढी अन्तःशुल्कबाट कर असुली गरेको छ भने स्वास्थ्य सेवा करमा कुनै कर असुली गरेको छैन । वैशाख महीनामा आन्तरिक राजस्व विभागले अन्तः शुल्क शिर्षकमा १ अर्ब ९६ करोड १३ लाख ४ हजार रुपैयाँ लक्ष्य दिएपनि १ अर्ब ५५ करोड ८७ लाख ६२ हजार रुपैयाँ कर असुली भएको छ ।
स्वास्थ्य सेवा कर शिर्षकमा १४ लाख ५१ हजार रुपैयाँ लक्ष्य दिएपनि कार्यालयले कुनै कर असुलेको छैन । वैशाख महीनामा विभागले दिएको लक्ष्य भन्दा बढी कर असुली कार्यालयले आयकर, बहालकर, ब्याजकर र मूल्य अभिवृद्धि कर शिर्षकमा मात्र गरेको छ भने मुल्य अभिवृद्धि कर, शिक्षा सेवा कर र स्वास्थ्य सेवा करमा लक्ष्य अनुसार कर असुली भएको छैन ।
जसअनुसार आयकर शिर्षकमा ११ करोड ४५ लाख ३५ हजार लक्ष्य लिइएकोमा १२ करोड ९३ लाख ४५ हजार रुपैयाँ राजस्व असुली भएको छ । मुल्य अभिवृद्धि करतर्फ १५ करोड १५ लाख ३८ हजार रुपैयाँ लक्ष्य दिइएकोमा १९ करोड ८७ लाख ६२ हजार रुपैयाँ कर असुली भएको छ । ब्याज कर शिर्षकमा १५ लाख ९२ हजार रुपैयाँ कर असुली भएको छ । उक्त शिर्षकमा ९६ लाख ५२ हजार रुपैयाँ कर असुली गर्ने लक्ष्य दिइएको थियो ।
यस्तै बहाल कर शिर्षकमा १ लाख ८९ हजार रुपैयाँ लक्ष्य दिइएकोमा २२ लाख ३५ हजार रुपैयाँ राजस्व असुली भएको छ भने शिक्षा सेवा करमा १ लाख ७१ हजार रुपैयाँ लक्ष्य दिइएकोमा जम्मा ७ हजार रुपैयाँ राजस्व असुली भएको छ ।
कार्यालयका सूचना अधिकारी कपिलराज नेपालले भरतपुर आन्तरिक राजस्व कार्यालयको मुख्य कर असुलीको श्रोत नै अन्तःशुल्क भएको र यस शिर्षकमानै कम राजस्व असुली भएकोले लक्ष्यभन्दा कम असुली भएको बताए ।
‘निषेधाज्ञाको हल्ला र त्रास वैशाख लागेपछि नै भयो’, उनले भने, ‘त्यसपछि मदिराजन्य उत्पादनको विक्री वितरण पनि रोकियोे ।’ अन्य शिर्षकमा लक्ष्यभन्दा बढी संकलन भएपनि अन्तःशुल्क शिर्षकको कर असुलीमा असर परेका कारण लक्ष्यभन्दा कम राजस्व असुली भएको उनको भनाइ छ । ‘बजारमा आर्थिक गतिविधि पनि कम भयो, मदिराजन्य वस्तुको माग र आपूर्ति पनि घट्यो’, उनले भने ।
वैशाख महीनासम्म १० महीनाको अवधिमा विभागले १५ अर्ब ६ करोड ३१ हजार रुपैयाँ लक्ष्य दिएकोमा १४ अर्ब ४ करोड ८७ लाख ३१ हजार रुपैयाँ राजस्व असुली भएको छ । विभागले कार्यालयलाई यसवर्ष १८ अर्ब ९१ करोड ५८ लाख ८१ हजार रुपैयाँ राजस्व असुली गर्ने लक्ष्य दिएको छ ।