चितवन । आन्तरिक राजस्व कार्यालय, भरतपुरले चालु आर्थिक वर्ष ०७९÷८० को जेठमा साढे २ अर्बभन्दा बढी राजस्व संकलन गरेको छ ।
कार्यालयले दिएको तथ्यांक अनुसार उक्त महीनामा सबैभन्दा बढी मदिरा तथा सूर्तीजन्य पदार्थको करबाट २ अर्ब ६४ करोड ७३ लाख ९९ हजार राजस्व संकलन गरेको हो । आन्तरिक राजस्व विभागले उक्त महीनामा यो शीर्षकमा ३ अर्ब ७ करोड ३९ लाख ५१ हजार रुपैयाँ असुली गर्ने लक्ष्य दिएको थियो ।
यस्तै मूल्य अभिवृद्धि करबाट जेठमा १७ करोड १५ लाख ११ हजार राजस्व असुली भएको छ । यस शीर्षकमा विभागले २४ करोड ८६ लाख १६ हजार रुपैयाँ असुली गर्ने लक्ष्य दिएको थियो । आयकर शीर्षक र स्वास्थ्य सेवा करमा भने कार्यालयले लक्ष्यभन्दा बढी कर संकलन गरेको छ । विभागले कार्यालयलाई आयकरमा १५ करोड १२ लाख ५४ हजार रुपैयाँ लक्ष्य दिएकोमा जेठमा २० करोड २३ लाख ३ हजार रुपैयाँ राजस्व संकलन भएको छ । स्वास्थ्य सेवा करमा २० लाख ७३ हजार लक्ष्य दिएकोमा ५१ लाख ८४ हजार रुपैयाँ संकलन भएको छ ।
कार्यालयका अनुसार बहाल कर शीर्षकमा ५६ लाख ८१ हजार लक्ष्य दिएकोमा ३५ लाख ९३ हजार रुपैयाँ असुली भएको छ । यस्तै, ब्याज कर शीर्षकमा ५१ लाख ८६ हजार लक्ष्य दिइएकोमा ३७ लाख ३६ हजार राजस्व असुली भएको छ ।
यी सबै शीर्षकमा जेठमा विभागले दिएको लक्ष्यभन्दा १३ दशमलव ५ प्रतिशत कम राजस्व असुली भएको हो । उक्त महिनाको लागि ३ अर्ब ४८ करोड ६७ लाख ४३ हजार लक्ष्य दिइएकोमा कार्यालयले ३ अर्ब ३ करोड १६ लाख ५६ हजार रुपैयाँ मात्र राजस्व असुली गरेको छ ।
कार्यालयका सूचना अधिकारी विष्णु रावतले विगतका महीनामा भन्दा जेठमा कर असुलीमा सुधार आएको बताए । ‘यो महीना पेय पदार्थ तथा सूर्तीजन्य पदार्थको निकासी पनि बढ्यो,’ उनले भने, ‘आयकर तिर्ने करदातालाई पनि हामीले ताकेता गर्याैं ।’
जेठमा मदिरा तथा सूर्तीजन्य र अन्य पेय पदार्थको निकासी बढी भएकोले गत महीनाको तुलनामा राजस्व असुली लक्ष्यमा सुधार आएको उनको भनाइ छ । वैशाखमा कार्यालयले लक्ष्यभन्दा २८ प्रतिशत कम राजस्व असुली गरेको थियो ।
चितवनको सबैभन्दा बढी राजस्वको श्रोत मदिराजन्य पदार्थ भएकोले यस शीर्षकमा बढी कर असुली हुने गरेको छ । सूर्तीजन्य उद्योग तथा कारखानाले स्वास्थ्य जोखिम कर तिरेकोले जेठमा स्वास्थ्य सेवा करमा लक्ष्यभन्दा बढी कर असुली भएको रावतले बताए ।
विभागले चालू आवको लागि २६ अर्ब २६ करोड ५९ लाख ७४ हजार राजस्व असुलीको लक्ष्य दिएकोमा हालसम्म १९ अर्ब ७३ करोड २५ लाख ५४ हजार असुली भएको कार्यालयले जनाएको छ ।