आन्तरिक राजस्व कार्यालय, भरतपुरमा अन्त:शुल्क शीर्षकमा २ अर्ब ६४ करोड राजस्व संकलन

चितवन । आन्तरिक राजस्व कार्यालय भरतपुरले जेठ महीनामा अन्त:शुल्क शीर्षकमा रू. २ अर्ब ६४ करोड राजस्व संकलन गरेको छ । कार्यालयका अनुसार मदिरा तथा सूर्तीजन्य पदार्थको कर रू. २ अर्ब ६४ करोड ७३ लाख ९९ हजार संकलन भएको हो । आन्तरिक राजस्व विभागले कार्यालयलाई अन्त:शुल्क शीर्षकमा उक्त महीना रू. ३ अर्ब ७ करोड ३९ लाख ५१ हजार असुली गर्ने लक्ष्य दिएको थियो ।  गत महीना कार्यालयले मूल्य अभिवृद्धि करबाट रू. १७ करोड १५ लाख ११ हजार राजस्व संकलन गरेको छ । यो शीर्षकमा विभागले रू. २४ करोड ८६ लाख १६ हजार असुलीको लक्ष्य दिएको थियो । आयकर र स्वास्थ्य सेवा शुल्क शीर्षकमा भने कार्यालयले लक्ष्यभन्दा बढी राजस्व उठाएको छ । विभागले कार्यालयलाई आयकरमा रू. १५ करोड १२ लाख ५४ हजार राजस्व असुलीको लक्ष्य दिएकोमा रू. २० करोड २३ लाख ३ हजार संकलन भएको छ भने स्वास्थ्य सेवा शुल्कमा रू. २० लाख ७३ हजार लक्ष्य रहेकोमा ५१ लाख ८४ हजार संकलन भएको छ । कार्यालयका अनुसार बहाल कर शीर्षकमा रू. ५६ लाख ८१ हजार राजस्व असुलीको लक्ष्यमा रू. ३५ लाख ९३ हजार असुली भएको छ । ब्याज कर शीर्षकमा ५१ लाख ८६ हजार लक्ष्यमा ३७ लाख ३६ हजार राजस्व असुली भएको छ । सबै शीर्षकमा गरी जेठका लागि विभागले दिएको लक्ष्यभन्दा १३ प्रतिशत कम राजस्व असुली भएको हो । उक्त महीनाका लागि रू. ३ अर्ब ४८ करोड ६७ लाख ४३ हजार राजस्व असुलीको लक्ष्य रहेकोमा कार्यालयले रू. ३ अर्ब ३ करोड १६ लाख ५६ हजार मात्र संकलन गर्न सकेको छ । कार्यालयका सूचना अधिकारी विष्णु रावतले विगतका महीनामा भन्दा जेठमा कर असुलीमा सुधार आएको बताए । ‘गत महीना पेयपदार्थ तथा सूर्तीजन्य पदार्थको निकासी पनि बढ्यो,’ उनले भने, ‘आयकर तिर्ने करदातालाई पनि हामीले ताकेता गर्‍यौं, सोहीअनुसार राजस्वमा पनि वृद्धि भयो ।’ कार्यालयको राजस्वको प्रमुख स्रोत मदिराजन्य पदार्थ भएकाले यस शीर्षकमा बढी कर असुली हुने गरेको छ । सूर्ती उद्योग तथा कारखानाले स्वास्थ्य जोखिम कर तिरेकाले जेठमा स्वास्थ्य सेवा शुल्कमा लक्ष्यभन्दा बढी कर असुली भएको सूचना अधिकारी रावतले बताए । विभागले चालू आर्थिक वर्षका लागि रू. २६ अर्ब २६ करोड ५९ लाख ७४ हजार राजस्व असुलीको लक्ष्य दिएको छ । जेठ मसान्तसम्ममा कार्यालयले रू. १९ अर्ब ७३ करोड २५ लाख ५४ हजार राजस्व संकलन गरेको छ ।