.jpg)
मंसिर १५, काठमाडौं । गत भदौ २३ गतेदेखि सञ्चालनमा आएको मेगा म्यचुअल फण्ड–१ ले कात्तिक मसान्तसम्ममा आकर्षक नाफा गरेको छ ।
असोज मसान्तसम्म रू. १५ लाख ३८ हजार नोक्सानीमा रहेको उक्त योजनाले कात्तिक मसान्तसम्म भने रू. १ करोड ३९ लाख ९१ हजार नाफा गरेको हो । कात्तिक मसान्तसम्म योजनाले रू. २ करोड ५८ लाख ३३ हजार जम्मा आम्दानी गरेको छ ।
यसमध्ये प्राप्त भइसकेको आम्दानी रू. ३३ लाख ७३ हजार र प्राप्त भइनसकेको आम्दानी रू. २ करोड २४ लाख ५९ हजार छ । असोज मसान्तसम्म योजनाको जम्मा आम्दानी रू. ६५ लाख १७ हजार मात्र थियो । आम्दानी बढेसँगै योजनाले नाफा गर्न सफल भएको देखिन्छ । आम्दानीसँगै योजनाको खर्च रकम पनि असोज मसान्तसम्मको भन्दा कात्तिक मसान्तसम्म बढी भएको छ ।
असोज मसान्तसम्म रू. ८० लाख ५६ हजार जम्मा खर्च गरेको योजनाले कात्तिक मसान्तसम्म रू. १ करोड १८ लाख ४१ हजार जम्मा खर्च गरेको हो ।
धितोपत्रमा लगानी गरी नाफा आर्जन गर्ने उदेश्यसहित सञ्चालनमा रहेको १० वर्षे अवधिको बन्दमुखी उक्त योजनाले कात्तिक मसान्तसम्म सूचीकृत र सूचीकृत नभएका शेयरमा धितोपत्र दलाल कमिशनसहित रू. २९ करोड १४ लाख ९० हजार लगानी गरेको छ ।
यो लगानीको बजारमूल्य भने सूचीकृत शेयरको रू. ३० करोड ११ लाख ३२ हजार र सूचीकृत नभएको शेयरको रू. १ करोड ५ लाख ४४ हजार छ । योजनाको धितोपत्रमा भएको लगानीको परलमूल्य भन्दा बजार मूल्य भने बढीनै रहेको छ । बैंक मुद्दती निक्षेपमा भने योजनाले रू. १२ करोड ५० लाख लगानी गरेको छ ।
उक्त योजना सञ्चालनका लागि मेगा क्यापिटल लिमिटेडले १२ करोड ५० लाख इकाई जारी गरेको थियो । योजनाको प्रतिइकाई खुद सम्पत्ति मूल्य पनि असोज मसान्तसम्मको भन्दा वृद्धि भएको छ । असोज मसान्तसम्ममा रू. ९ दशमलव ९९ रहेको योजनाको प्रतिइकाई खुद सम्पत्ति मूल्य कात्तिक मसान्तसम्ममा रू. १० दशमलव ११ कायम भएको छ ।
.jpg)
