मेगा म्युचुअल फण्ड–१ को धितोपत्रमा गरेको लगानीको परल मूल्यभन्दा बजारमूल्य कम

पुस १५, काठमाडौं । मेगा म्युचुअल फण्ड अन्तर्गत सञ्चालित मेगा म्युचुअल फण्ड–१ ले मंसिर महीनामा धितोपत्रमा गरेको लगानीको परलमूल्य धितोपत्र दलाल कमिशन सहित रू. ६२ करोड ९१ लख ३६ हजार रहेको छ ।  योजनाले बिहीवार सार्वजनिक गरेको यस अवधिसम्मको खुद सम्पत्ति मूल्य सम्बन्धी विवरणमा यस्तो देखिएको हो । योजनाले धितोपत्रमा गरेको लगानीको बजारमूल्य भने रू. ५६ करोड ३६ लाख ३९ हजार मात्र रहेको छ ।  योजनाले गरेको लगानीको परल मूल्यभन्दा बजार मूल्य कम रहेको हो । यो महीना योजनाको बैंक मुद्दती निक्षेपमा रू. १२ करोड ५० लाख रहेको छ । योजनाको प्रति इकाई खुद सम्पत्ति मूल्य यो महीना रू. ९ दशमलव ४३ रहेको छ ।  कात्तिक महीनामा योजनाको यो मूल्य रू. १० दशमलव ११ रहेको थियो । यो महीना जम्मा आम्दानी ऋणात्मक हुँदा योजनाले रू. ७ करोड ११ लाख २ हजार नोक्सानी व्यहोरेको छ ।  कात्तिक महीनामा रू. २ करोड ५८ लाख ३३ हजार जम्मा आम्दानी गर्दा योजनाले रू. १ करोड ३९ लाख ९१ हजार नाफा गरेको थियो । मंसिर महीनामा योजनाको खर्च पनि बढी भएको छ । कात्तिक महीनामा रू. १ करोड १८ लाख ४१ हजार खर्च गरेको योजनाले मंसिर महीनामा रू. १ करोड ३५ लाख ३५ हजार खर्च गरेको हो । १० वर्षे अवधिको बन्दमुखी प्रकृतिको यस योजना यसै वर्षको भदौ २३ गतेदेखि सञ्चालनमा आएको हो । यो योजना २०८८ भदौ २२ गते परिपक्व हुनेछ ।