खुद ब्याज आम्दानी र सञ्चालन नाफामा वृद्धि भएसँगै साधना लघुवित्तको खुद नाफा २१% बढ्यो

वैशाख १३, काठमाडौं । साधना लघुवित्त वित्तीय संस्था लिमिटेडले चालू आवको तेस्रो त्रैमासिक वित्तीय विवरण मंगलवार सार्वजनिक गरेको छ । उक्त वित्तीय विवरण अनुसार कम्पनीको खुद नाफा गत आवको तेस्रो त्रैमासको तुलनामा चालू आवको सोही अवधिमा २१ दशमलव ६१ प्रतिशत वृद्धि भएको छ । गत आवमा कम्पनीले रू. ७ करोड ५८ लाख नाफा कमाएकोमा चालू आवको सोही अवधिमा वृद्धि भएर रू.९ करोड २२ लाख पुगेको हो । चालू आवमा कम्पनीको खुद ब्याज आम्दानी र सञ्चालन नाफामा वृद्धि भएकाले खुद नाफा बढेको हो । साथै चालू आवमा कम्पनीले रू. १ करोड ९० लाख खराब कर्जा उठाउन कम्पनी ब्यवस्थापन सफल भएकाले पनि नाफा बढ्न टेवा पुगेको हो । गत आवको तुलनामा चालू आवमा कम्पनीको खुद ब्याज आम्दानी ३७ प्रतिशत र सञ्चालन नाफा ३५ प्रतिशत वृद्धि भएको छ । त्यसैगरी कम्पनीको चुक्तापूँजी रू. ३२ करोड १२ लाख रहेको छ भने चालू आवको तेस्रो त्रैमाससम्ममा कम्पनीले जगेडामा रू. १५ करोड २७ लाख सञ्चित गरेको छ । सो अवधिमा कम्पनीले रू. ३ अर्ब ७८ करोड सापटि लिएर, रू. १ अर्ब २७ करोड निक्षेप संकलन गरेर रू. ५ अर्ब ४० करोड भन्दा बढी कर्जा लगानी गरेको छ । चालू आवको तेस्रो त्रैमाससम्ममा कम्पनीको प्रतिशेयर आम्दानी रू. ३८ दशमलव २७ (वार्षिक), मूल्य आम्दानी अनुपात ३२ दशमलव १४ गुणा, तरलता अनुपात ५ दशमलव ६२ प्रतिशत र प्रतिशेयर नेटवर्थ रू.१४७ दशमलव ५५ रहेको छ ।