काठमाडौं । नेपाली कफीको गुणस्तर बढाउन ईयू–नेपाल व्यापार तथा लगानी कार्यक्रमले अन्तरराष्ट्रिय स्तरका दुई दर्जन कफी रोस्टर तयार गरेको छ । विश्वभर विशिष्ट स्वाद र गुणका कफीको गुणस्तर अनुगमन गर्ने संस्था विशिष्ट कफी संघको मापदण्डअनुसार उनीहरू प्रशिक्षित भएका हुन् ।
राष्ट्रिय चिया तथा कफी विकास बोर्ड र नेपाल कफी उत्पादक महासंघको सहकार्यमा काठमाडौंमा आयोजित कार्यशालामा काठमाडौं, चितवन, पोखरा, काभ्रे, धनकुटालगायत कफी रोस्टरहरू सहभागी थिए । कफीको कपमा गुणस्तर अभिवृद्धि गरी नेपाली विशिष्ट कफीलाई अझ लोकप्रिय बनाउन आवश्यक दक्ष जनशक्ति उत्पादन गर्ने उद्देश्यले कफी रोस्टिङ क्षेत्रमा संलग्न व्यवसायी तथा कामदारलाई लक्ष्य गरी कार्यशाला आयोजना गरिएको बताइएको छ ।
नेपालमा सञ्चालन भइरहेका कफी रोस्टिङ कम्पनीहरूमा उच्च गुणस्तरको कफी रोस्टिङ गर्ने प्राविधिक शीपको अभाव रहेको बेला यो कार्यशालाले यस क्षेत्रमा अन्तरराष्ट्रिय स्तरका कफी रोस्टरहरू उत्पादन गरेको र यसबाट कफीको गुणस्तर अभिवृद्धिमा सहयोग पुग्ने अपेक्षा गरिएको छ । नेपालमा करीब २०–२५ कफी रोस्टिङ फर्महरू सञ्चालनमा छन् ।
‘कफी रोस्टिङ निकै प्राविधिक र जटिल विषय हो । रोस्टिङ गरिएको कफीको दानाले नै कफीको गुणस्तर निर्धारण हुन्छ । यो कार्यशालाको पाठ्यक्रम नै प्रशिक्षार्थीलाई रोस्टिङका प्राविधिक पक्षलाई प्रयोगात्मक रूपमा देखाई उनीहरूलाई यसमा परिचित र दक्ष बनाउने हो । यसै क्षेत्रमा कार्यरत सहभागीहरू भएकोले अन्तरराष्ट्रिय मापदण्ड अनुसारको रोस्टिङ शीपले कफीको गुणस्तर बढाउन ठूलो सहयोग गर्नेछ,’ कार्यशालाका मूल प्रशिक्षक निमा शेर्पाले भने ।
कार्यशालामा उच्चस्तरीय प्रयोगशालामा प्रयोगात्मक विधि र सैद्धान्तिक ज्ञानमार्फत सहभागीलाई रोस्टिङ प्रक्रियाबारे परिचित गरी दक्ष बनाइएको बताउँदै अन्तरराष्ट्रिय मान्यता प्राप्त प्रशिक्षक शेर्पाले यस कार्यशालामा विशेषगरी रोस्ट साइकल, रोस्ट लेभलदेखि कफीको दानामा देखिने परिवर्तनहरू पहिचान गर्ने र रोस्टिङ स्थल व्यवस्थापन गर्ने विधि सिकाइएको बताए ।
कार्यशालाले नेपाली कफीको मूल्य शृंखलालाई सुधार गर्न सहयोग पुग्ने विश्वास सरोकारवालाको छ । ‘उच्च गुणस्तरको रोस्टर भएका कफी व्यवसायले उच्च स्तरका उपभोक्तालाई आकर्षित गर्न र राम्रो नाफा आर्जन गर्न सक्छन् । त्यस्ता दक्ष रोस्टरहरूले क्याफे र रोस्टिङ व्यवसायको प्रोफाइललाई सुदृढ पार्नेछन् र गुणस्तर नियन्त्रणमा उनीहरूको प्रतिबद्धता प्रदर्शन गर्नेछन् भन्ने विश्वास हामीले लिएका छौं,’ नेपाल कफी उत्पादक महासंघका महासचिव सन्तोष पोखरेलले भने ।
‘मैले यो कार्यशाला निकै ज्ञानवद्र्धक र फलदायी पाएँ । यहाँबाट प्रशिक्षित हामी जस्ता जनशक्तिमार्फत कफी रोस्टिङमा गुणस्तर प्रवर्द्धन गर्ने प्रविधि प्रयोग गरी कफीको गुणस्तर बढाउन सहयोग गर्न सकिनेमा म विश्वस्त छु,’ चितवनबाट सहभागी हुन आएकी प्रशिक्षार्थी घोमाया गुरूङले भनिन् ।
युरोपियन युनियनले नेपाली कफीको मूल्य शृंखलालाई सशक्त बनाउन सहयोग गर्दै आएको छ ।
