आज बिहिबार मन्त्रिपरिषद्को बैठक बस्दै छ। आज अपरान्ह ४ बजे प्रधानमन्त्रीको सरकारी निवास बालुवाटारमा मन्त्रिपरिषद् बैठक बस्न लागेको हो। आजको बैठकले ब्यापक रुपमा नयाँ नियुक्ति, सरुवा, बढुवा, लगायतक निर्णय गर्ने बताईएको छ । निर्वाचन आयोगले आसन्न स्थानीय तहको निर्वाचनको लागि भोलि चैत्र २५ गतेदेखि निर्वाचन आचार संहिता लागु गर्ने तयारी गरेको छ । आचारसंहिता लागु भएपछि सरुवा, बढुवा, नियुक्ति लगायतका कार्य गर्न नपाइने भएकोले सरकारले आज नै यी निर्णय गर्ने तयारी गरेको हो । आजको बैठकले नेपाल टेलिकमको प्रबन्ध निर्देशक पनि नियुक्त गर्ने तयारी गरेको छ । नेपाल टेलिकमको प्रबन्ध निर्देशक पदमा नियुक्तिको लागि ३ जनाको नाम सिफारिस भईसकको छ । सञ्चार मन्त्रालयका सचिव वैकुण्ठ अर्यालको नेतृत्वमा गठित छनौट तथा सिफारिस समितिको बैठकले टेलिकमको प्रबन्ध निर्देशक पदमा नियुक्तिको लागि ३ जनाको नाम मन्त्रिपरिषदमा सिफारिस गर्ने निर्णय गरेको हो। समितिले संगीता पहाडी अर्याल, सुरज सिंह थापा र सुशील पौडेलको नाम सिफारिस गरेको हो। पहाडी र थापा टेलिकमकै निर्देशक पदमा कार्यरत छन् भने पौडेल बाहिरबाट सिफारिसमा परेका हुन् । पौडेल हाल संचार मन्त्रालय अन्तर्गत कै राष्ट्रिय सूचना प्रविधि केन्द्रको कार्यकारी निर्देशक पदमा कार्यरत छन् ।स्रोतका अनुसार यी ३ मध्ये सुशील पौडेल टेलिकमको प्रबन्ध निर्देशकमा नियुक्त हुने सम्भावना उच्च छ । उनलाई नै प्रबन्ध निर्देशकमा नियुक्त गर्ने गरि छनौटको मापदण्ड नै परिवर्तन गरिएको स्रोतको दाबी छ ।त्यस्तै सरकारले आज नै मन्त्रिपरिषद् हेरफेर गर्ने तयारी गरेको समेत चर्चा छ । एक नयाँ मन्त्री नियुक्त गर्ने र एक मन्त्रीको पोर्टफोलियो परिवर्तन गर्ने तयारी भईरहेको सत्ता गठबन्धनका नेताहरुले बताएका छन् । उनीहरुका अनुसार कानुन विद् गोबिन्द बन्दीलाई कानुन मन्त्री नियुक्त गरेर हालका कानुन मन्त्री दिलेन्द्र बडूलाई उद्योग मन्त्रालयको जिम्मेवारी दिने तयारी छ । हाल उद्योग मन्त्रालय मन्त्री बिहिन रहेको छ । कानुनविद् बन्दी सांसद छैनन्, तर सांसद नरहेका व्यक्तिलाई पनि ६ महिनाको लागि मन्त्री नियुक्त गर्न सक्ने प्रावधान अनुसार उनलाई मन्त्री नियुक्त गर्ने तयारी भएको बताईएको छ ।
