असोज ६, काठमाडौं । सरकारले धानको समर्थन मूल्य तोकेको छ ।
गत भदौ २९ गते बसेको मन्त्रिपरिषद्को बैठकले समर्थन मूल्य तोकेको कृषि तथा पशुपन्छी विकास मन्त्रालयले जानकारी दिएको छ ।
मन्त्रालयका अनुसार चालू आर्थिक वर्षका लागि मोटा धानको प्रतिक्विन्टल मूल्य रू. दुई हजार ७५२ र मध्यम किसिमको धानको मूल्य रू. दुई हजार ९०२ तोकिएको हो ।
मन्त्रालयका सहसचिव एवम् प्रवक्ता प्रकाश सञ्जेलका अनुसार गत वर्षको तुलनामा यसवर्ष प्रतिक्विन्टल रू. १७ ले बढी हो ।
गत वर्ष असारे धान लगाउनुपूर्व नै सरकारले धानको सर्मथन मूल्य तोकेको थियो । गत वर्ष मोटा धान प्रतिक्विन्टल रू. दुई हजार ७३५ र मध्यम धानको मूल्य रू. दुई हजार ८८५ तोकिएको थियो ।
समयमा नै मूल्य नतोक्दा व्यवसायीले मनोमानी मूल्यमा धान खरीद गर्ने भन्दै सरकारले प्रत्येक वर्ष मोटा र मध्यम किसिमका धानको न्यूनतम समर्थन मूल्य तोक्दै आएको छ । रासस
