प्रकाश थापामगर/गोविन्दकुमार शर्मा, काठमाडौँ ।।
प्रतिनिधि सभा पुनर्स्थापनाको पक्षमा अखिल (छैठौं) ले राजधानीमा मसाल जुलुस सम्पन्न गरेको छ । अखिल (छैठौं) केन्द्रीय समितिको आयोजनमा २०७७ पुस २५ गते साँझ रत्नपार्क शान्तिवाटिकामा मसाल जुलुस सम्पन्न गरिएको हो ।
देशभरिबाट काठमाडौँ आइपुगेका विद्यार्थीहरूले भक्तपुर बसपार्कबाट मसाल जुलुस सुरु गरेका थिए । प्रहरी दमनको सामना गर्दै उक्त मसाल जुलुस शान्तिवाटिकामा आइपुगेपछि कोणसभामा परिणत भएको थियो ।
कोणसभालाई सम्बोधन गर्दै अखिल (छैठौं) का केन्द्रीय अध्यक्ष विमल पोखरेलले संविधानलाई कुल्चेर केपी ओलीले प्रतिनिधि सभा विघटन गरेको बताउनुभयो ।
‘प्रधानमन्त्री केपी ओलीले २०७२ सालको संविधानलाई कुल्चेर प्रतिनिधि सभा विघटन गरेका हुन्’ अध्यक्ष पोखरेलले भन्नुभयो– ‘हठात् गरिएको प्रतिनिधि सभा विघटन तत्कालै पुनर्स्थापना गरिनुपर्दछ ।’
उहाँले केपी ओलीको प्रतिनिधि सभा विघटन गर्ने कदमलाई एकलौटी र अधिनायकवादी पनि बताउनुभयो ।
‘पार्टीको आन्तरिक झगडाका कारणले जनमतकै अपमान गर्ने काम केपी ओलीबाट भयो– पोखरेलले भन्नुभयो– ‘जननिर्वाचित प्रतिनिधि सभालाई विघटन गर्नु नेपाली जनताप्रतिको घोर अपमान नै हो ।’
‘प्रधानमन्त्री ओलीले जनताको अधिकारमाथि कुठाराघात गरेका छन्’ सर्वोच्च अदालतमा पुगेको यस विवादको बारेमा उहाँले अगाडि भन्नुभयो– ‘सर्वोच्चले सरकारले उठाएको गलत कदम तत्कालै सच्याउनुपर्दछ ।’
उहाँले भन्नुभयो– ‘सर्वोच्च अदालतले २०७२ सालको संविधानको प्रावधानअनुसार विघटित प्रतिनिधि सभा तत्कालै पुनर्स्थापना गर्नुपर्दछ; र, ओली सरकारको निरङ्कुश तथा अधिनायकवादी कदमलाई पराजित गर्नुपर्दछ ।’
कोणसभाको सञ्चालन अखिल (छैठौं) का महासचिव महेशराज जोशीले गर्नुभएको थियो ।