काठमाडौं । राष्ट्रिय स्वतन्त्र पार्टीका सांसद र नेपाल उद्योग वाणिज्य महासंघ (एफएनसीसीआई)का प्रतिनिधिबीच अर्थतन्त्रको विद्यमान अवस्थाबारे छलफल भएको छ ।
महासंघ सचिवालय टेकुमा अर्थतन्त्रमा उत्पन्न समस्या एवं समाधानका उपायहरूका सम्बन्धमा भएको छलफलमा महासंघको टोलीले अर्थतन्त्रको बाह्य क्षेत्रमा सुधार देखिएपनि आन्तरिक स्वास्थ्य राम्रो नभएको बताएको छ ।
छलफलमा महासंघका अध्यक्ष शेखर गोल्छा, वरिष्ठ उपाध्यक्ष चन्द्र प्रसाद ढकाल सहित पदाधिकारीहरू र रास्वपाबाट संसदीय दलका नेता डोल प्रसाद अर्यालको नेतृत्वमा आएको सांसदहरूको टोली सहभागी थियो ।
सो अवसरमा अध्यक्ष गोल्छाले अर्थतन्त्रको पछिल्लो अवस्थाका बारेमा विस्तृत जानकारी गराउँदै बाह्य क्षेत्रमा केही सुधार देखिएपनि अर्थतन्त्रको आन्तरिक स्वास्थ्य भने चिन्ताजनक नै रहेको बताएका हुन् ।
सार्कमा कतिपय देशको तुलनामा विदेशी मुद्रा संचिति, मुद्रास्फिति, आन्तरिक एवं बाहय ऋणको अनुपातका हिसाबले नेपालको अर्थतन्त्र मजवुत देखिएपनि चर्को ब्याजदर, तरलता संकट, निर्माण क्षेत्रमा आएको सुस्तता लगायतका इन्डिकेटरका कारण अर्थतन्त्रको स्वास्थ्य चिन्ताजनक रहेको गोल्छाले बताए ।
अर्थतन्त्र गम्भीर संकटमा हुनुमा विशेष त सरकारको आर्थिक नीति र केन्द्रीय बैंकको मौद्रिक नीति बीच तादात्म्यता नमिल्नु नै मुख्य कारण रहेको पनि उनले जिकिर गरे । जसको परिणाम देशको अर्थव्यवस्था नै संकटउन्मुख रहेको गोल्छाको भनाइ थियो ।
कोभिड लगत्तै ओभर हिटेड भएको अर्थतन्त्रको सही विश्लेषण गरेर नीति लिनुपर्नेमा त्यसमा विचार नगरी अधिक तरलता छोड्दा अहिलेको समस्या आएको अध्यक्ष गोल्छाको दाबी छ ।
यसरी अर्थतन्त्रमा संकट आउँदा सरकार र निजी क्षेत्रले बाह्य लगानी र ऋण ल्याउन नसकेको उनले स्वीकारे । सरकार वितरणमुखी भैदिंदा अर्थतन्त्रमा समस्या आएको र विकास खर्च नबढेसम्म देश अगाडि नबढ्ने गोल्छाले ठोकुवा गरे ।
अहिलेको संकट समाधान गर्ने हो भने वितरणमुखी कार्यलाई रोकेर विकास खर्च बढाउनै पर्ने र यसका लागि सरकारले कठोर निणर्य लिनुपर्ने उनको भनाइ थियो ।
अध्यक्ष गोल्छाले सहकारी तथा लघुवित्त संस्थाहरुको प्रभावकारी नियमन गर्ने इस्यूलाई संसदमा प्रभावकारी ढंगबाट उठाउन पनि सुझाव दिए ।
महासंघले आगामी दश वर्षको मुलुकको अर्थतन्त्र १०० अर्ब डलर पुर्याउने, अतिरिक्त थप २२ लाख रोजगारी सृजना गर्ने लगायतका उद्देश्यले 'नेट २०३०' सार्वजनिक गरेको र त्यसको कार्यान्वयनका लागि सरकारको समेत प्रतिवद्धता आएकाले यसलाई सफल पार्न स्वतन्त्र पार्टीको पनि सहयोग महत्वपूणर् हुने उनले बताए ।
अध्यक्ष गोल्छाले विधायक र निजी क्षेत्र बीच अर्थतन्त्रका विषयमा निरन्तर छलफल अन्तरक्रिया आवश्यक रहेको परिप्रेक्षमा राष्टिय स्वतन्त्र पार्टीको यो प्रयासको प्रशंसा समेत गरे । उनले इस्यूमा आधारित छलफलहरु निरन्तर गर्न पनि सल्लाह दिए ।
राष्टिय स्वतन्त्र पार्टीका संसदीय दलका नेता अर्यालले मुलुकको अर्थतन्त्र, उद्योग व्यवसायका इस्यूहरु माथि छलफल एवं अध्ययन गर्न महासंघमा आएको बताए ।
योजनागत विकासको दशकौ अभ्यास गदै आएपनि अहिले पनि हामी पिछडीएकै राष्टमा दरिनुपर्ने बाध्यता हाम्रा लागि दुर्भाग्य भएको भन्दै कसरी हामी विकासको मार्गमा हिड्न सक्छौं, समस्या कहां छ भन्ने सम्बन्धमा छलफल गर्न अर्थतन्त्रको इन्जिन निजी क्षेत्रको छाता संस्थामा आएको पौडेलको भनाइ थियो ।
छलफलमा महासंघका वरिष्ठ उपाध्यक्ष ढकालले निजी क्षेत्रलाई हेर्ने दृष्टिकोणमा परिवर्तन अपरिहार्य रहेको, अर्थतन्त्र, उद्योग व्यवसाय सम्बन्धी नीति निर्माण गर्दा सरोकारवाला निजी क्षेत्रसंग पर्याप्त छलफल पश्चात मात्र ल्याउने अभ्यास गर्नुपर्ने र मुलुक बनाउने कुरामा आफ्ना स्वार्थलाई छोडेर निणर्य गर्न सक्ने परिपाटी दलहरुमा बसाल्नुु पर्ने बताए ।
महासंघका उपाध्यक्ष रामचन्द्र संघाई र कोषाध्यक्ष सुकुन्तलाल हिराचनले उत्पादनमुलक उद्योगमै गएर उनीहरुका समस्या बुझेर संसदमा आवाज उठाई दिन रास्वपा सांसदलाई आग्रह गरेका थिए । पैसा बैंकमा जम्मा गरेर ब्याज खाने प्रवृति सरकारी निकायमा समेत रहेकाले अर्थतन्त्र समस्यामा पर्दै गएको उद्योगीहरूको भनाइ थियो ।
सो अवसरमा स्वतन्त्र पार्टीका सांसदहरुले निजी क्षेत्रका समस्या, उद्योग व्यवसाय सिथिल हुँदै जानुको कारण, श्रम बजारका समस्या, रोजगारीका अवसर सिर्जना, आयात निर्यात बीचको खाडल कम गर्न चाल्नु पर्ने उपाय, कृषि क्षेत्रको विकास, बाह्य लगानी आकर्षण गर्न गर्नुपर्ने प्रयास लगायतमा जिज्ञासा राखेका थिए । कार्यक्रमको समन्वय महासंघका महानिर्देशक गोकणर्राज अवस्थीले गरेका थिए ।
