काठमाडौं । कोरोना संक्रमण नियन्त्रणमा आउन नसकेको निष्कर्ष निकाल्दै काठमाडौं उपत्यकामा निषेधाज्ञालाई कडाइका साथ १ साताका लागि थप गरिएको छ । मंगलवार बसेको उपत्यकाका तीन जिल्लाका प्रमुख जिल्ला अधिकारी (प्रजिअ)हरूको बैठकले अहिले चालेका कदमहरूले अपेक्षित नतिजा दिन नसकेको निष्कर्ष निकाल्दै थप कडाइका साथ निषेधाज्ञालाई जेठ २० गतेसम्म जारी राख्ने निर्णय गरेको काठमाडौं जिल्लाका प्रजिअ कालीप्रसाद पराजुलीले जानकारी दिए ।
बैठकले सरकारले जारी गरेको कोभिड संकट अध्यादेशको प्रभावकारी कार्यान्वयन गर्ने निर्णयसमेत गरेको छ । पसलहरूबाट भाइरस संक्रमणको जोखिम बढेको निष्कर्ष निकाल्दै जिल्ला प्रशासनहरूले पसल खुल्ने अवधि घटाएका छन् । एक सातासम्म थप गरिएको निषेधाज्ञामा खाद्यान्न र निर्माण सामग्री ढुवानीलाई स्थगित गर्ने, सार्वजनिक तथा निजी निर्माण पनि रोक्ने निर्णय भएको ललितपुरका प्रजिअ ढुण्डीप्रसाद निरौलाले जानकारी दिए ।
काठमाडाैं जिल्लाका प्रजिअ पराजुलीका अनुसार निषेधाज्ञा थपिएको अवधिमा खाद्यान्न र किराना पसलसमेत खोल्न पाइने छैन । ‘खाद्यान्नलगायतका सामान खरीदका लागि हामीले २ दिनको समय दिएका छौं,’ उनले भने । सरकारी गाडीलगायत अन्य अनुमति पाएका गाडीका लागि पनि समय छुट्ट्याइएको जानकारी उनले दिए । ‘अत्यावश्यक कार्यालयका गाडी चल्न दिएका थियौं तर दिउँसो पनि सडकमा जाम देखियो,’ उनले भने, ‘अब बिहान ९ : ३० देखि १० बजेसम्म र साँझ ५ बजेदेखि ६ बजेसम्म मात्र त्यस्ता गाडी चल्न दिने निर्णय गरेका छौं ।’ बैंक तथा वित्तीय संस्थाको हकमा वाणिज्य बैंक र विकास बैंकका शाखालाई सीमित रूपमा खुल्न दिने निर्णय भएको छ । अब वाणिज्य बैंकका तीन र विकास बैंकका दुई शाखा मात्र खुल्न पाउनेछन् । वाणिज्य बैंकका हकमा प्रधान कार्यालय र तीनओटा शाखा कार्यालय तथा विकास बैंकको हकमा प्रधान कार्यालय र २ शाखा कार्यालय मात्रै खुल्न पाउनेछन् ।
आलोपालो गरी न्यूनतम जनशक्ति (२० प्रतिशत) मात्र प्रयोग गरी कार्य सञ्चालन गर्न दिने निर्णयसमेत भएको छ । यसको अनुगमन जिल्ला प्रशासन कार्यालयले गर्ने निर्णय भएको छ ।
बैंकका सवारीसाधन सञ्चालनको हकमा बढीमा दुईओटा सवारी पास जारी गरी त्यसको विवरण राष्ट्र बैंक र जिल्ला प्रशासन कार्यालयलाई दिनुपर्ने नियम बनाइएको छ । यस्तै, उपत्यकामा जारी निषेधाज्ञा अवधिभर अत्यावश्यकबाहेकका सरकारी कार्यालय, सार्वजनिक संस्थान, बीमा कार्यालयको सेवा बन्द हुने भएका छन् ।
बैठकले अत्यावश्यकबाहेकका सरकारी कार्यालयसमेत बन्द गर्ने निर्णय गरेको छ । साथै सरकारी कार्यालय, सार्वजनिक संस्थान, बैंक, इन्टरनेट प्रदायक संस्था र एनसेलका सवारीसाधन बिहान साढे ९ बजेदेखि साढे १० सम्म र बेलुका ५ देखि ६ बजेसम्म मात्र सञ्चालन हुन पाउनेछन् ।
वैशाख १६ गतेदेखि शुरू भएको निषेधाज्ञा पछिल्लोपटक २ साता थपेर जेठ १३ गते रातिसम्म पुर्याइएको थियो । नयाँ निर्णयअनुसार अब जेठ २० गते मध्यरातसम्म निषेधाज्ञा जारी रहनेछ ।
सरकारले निषेधाज्ञालाई पछिल्लो समय कडाइ गर्दै गए पनि काठमाडौं उपत्यकामा संक्रमण दरमा अपेक्षित रूपमा कमी आउन सकेको छैन । मंगलवार मात्रै काठमाडौं उपत्यकामा २ हजार ६१३ जना कोरोना संक्रमित थपिएको स्वास्थ्य मन्त्रालयले बतायो ।
स्वास्थ्य तथा जनसंख्यामा मन्त्रालयका अनुसार सबैभन्दा धेरै काठमाडौंमा १ हजार ८६३ जना संक्रमित थपिएका छन् भने भक्तपुरमा ३२३ र ललितपुरमा ४२७ जना संक्रमित थपिएको देखिन्छ । मन्त्रालयका अनुसार काठमाडौंमा १६ हजार ३३८, भक्तपुरमा ४ हजार ९५३ र ललितपुरमा ७ हजार १५२ जना सक्रिय संक्रमित छन् ।
