कैलाली । कैलालीको धनगढी उपमहानगरपालिका–६ जाइजालीमा सिँचाइ बाँध निर्माण भएको छ । सुदूरपश्चिम प्रदेश सरकारको ९ करोड ४५ लाख रुपैयाँ लागतमा सो बाँधको निर्माण सम्पन्न भई सञ्चालनमा आएको जलस्रोत तथा सिँचाइ विकास डिभिजन कार्यालय कैलालीका प्रमुख डम्बरप्रसाद धितालले बताए । बाँध निर्माण सम्पन्न भई सञ्चालनमा आएपछि ३७६ हेक्टर क्षेत्रफलमा सिँचाइ हुने र ३८० परिवारका २ हजार ५०० भन्दा बढी प्रत्यक्ष लाभान्वित हुने धितालले जानकारी दिए ।
सो बाँध केएस रोयल जेभीले तोकिएको समयभन्दा ६ महीनाअघि नै निर्माण सम्पन्न गरेको हो । स्थानीय उपभोक्ता रामप्रसाद चौधरीले पानी पाएपछि धान र गहुँ धेरै फल्ने भन्दै तरकारी पनि वर्षमा दुई/तीनपटक लगाएर स्थानीयवासीको आयआर्जनमा वृद्धि हुने विश्वास व्यक्त गरे । सिँचाइ बाँध निर्माणसँगै धनगढी–६ जाइजालीलाई तरकारी पकेट क्षेत्रका रूपमा विकास गरिने वडाध्यक्ष भागीराम चौधरीले बताए । उनका अनुसार सो वडाका स्थानीय कृषकले व्यावसायिक रूपमा तरकारीखेती गर्दै आएका छन् । रासस
