काठमाडौं (अस) । युवा उद्यमीहरूको सामाजिक संस्था राउण्ड टेबल नेपालले आगामी असार ४ गते विशेष कार्यक्रम गर्ने भएको छ । डाउनसिन्ड्रोम तथा अटिजम भएका बालबालिकाका लागि छुट्टै विद्यालय निर्माण गर्ने उद्देश्यले राउण्ड टेबल नेपालले कार्यक्रम गर्ने भएको हो । ‘आगामी असार ४ अर्थात् जुन १८, २०२२ का शनिवार एक विशेष कार्निभल आयोजना गरिने भएको छ,’ संस्थाले जारी गरेको विज्ञप्तिमा उल्लेख गरिएको छ, ‘जुन वियर कार्निभल’ नाममा आयोजना हुने उक्त कार्यक्रम वियर फेष्टिभल र पारिवारिक कार्निभलको संयुक्त रूप हुनेछ ।’ कार्यक्रमको उद्देश्य विभिन्न स्कुल निर्माण तथा समाजिक सेवा रहेको बताइएको छ ।
‘स्कुल फर स्पेसल नाम दिइएको परियोजना अन्तर्गत पहिलो चरणमा काठमाडौं उपत्यकामा एक विशेष स्कुल निर्माण गरिनेछ,’ विज्ञप्तिमा भनिएको छ, ‘डाउनसिन्ड्रोम तथा अटिजम भएका बालबालिकालाई पढाउने जुनसुकै स्कुलको विकास र वृद्धिका लागि विशेष सहयोग समेत गरिनेछ ।’
डाउनसिन्ड्रोम तथा अटिजमप्रति जनचेतना अभिवृद्धि गर्दै फरक क्षमता भएका बालबालिकाको शिक्षा तथा वैयक्तिक विकासमा सहयोगी बन्ने उद्देश्यले राउण्ड टेबलले युवा लक्षित कार्यक्रमको आयोजना गर्ने उल्लेख गरिएको छ । कार्यक्रमबाट भएको आम्दानीको शतप्रतिशत रकम डाउनसिन्ड्रोम तथा अटिजम भएका बालबालिकाको शिक्षामा खर्च गरिने आयोजक संस्थाका अध्यक्ष शरद केडियाले बताए ।
