साउन ४, काठमाडौं । साताको दोस्रो कारोबार दिन सोमवार कारोबारमा आएका २१९ ओटा कम्पनीमध्ये सात ओटा कम्पनीका शेयरधनीले सर्वाधिक कमाएका छन् ।
यो दिन सिनर्जी पावर डेभलपमेण्ट कम्पनी, बिशाल बजार कम्पनी, नेपाल इन्स्योरेन्स, नागरिक लगानी कोष, हिमालयन उर्जा विकास कम्पनी, अरुण काबेली र हिमालयन पावर पार्टनरका शेयरधनीले सर्वाधिक कमाएका छन् ।
दोहोरो अंकले बजार बढेसँगै ती सात ओटै कम्पनीको शेयरमूल्यमा उच्च दरले वृद्धि भएका कारण शेयरधनीले कमाएका हुन । ती सात ओटा कम्पनीमध्ये सबैभन्दा बढी सिनर्जी पावर कम्पनीको शेयरमूल्य अघिल्लो कारोबार दिनको तुलनामा १० प्रतिशतले वृद्धि भएको छ । कम्पनीको शेयरमूल्य प्रतिकित्ता रू.५१४ पुगेको हो ।
त्यसैगरी बिशाल बजार कम्पनीको शेयर मूल्य अघिल्लो कारोबार दिनको तुलनामा ९ दशमलव २० प्रतिशत,नेपाल इन्स्योरेन्स कम्पनीको ७ दशमलव ५७ प्रतिशत,नागरिक लगानी कोषको ६ दशमलव ४० प्रतिशत,अरुण काबेली पावरको ५ दशमलव ७० प्रतिशत र हिमालयन पावर पार्टनरको शेयरमूल्य ५ दशमलव २८ प्रतिशतले वृद्धि भएको हो ।
ती सात ओटै कम्पनीको शेयरमा विक्रेताभन्दा क्रेता धेरै भएकाले शेयरमूल्य बढेको हो । बिशाल बजार कम्पनीको शेयरमूल्य प्रतिकित्ता रू.६ हजार १७०, नेपाल इन्स्योरेन्सको रू.१ हजार १५०, नागरिक लगानी कोषको रू. ३ हजार ७२४, हिमालयन उर्जा विकास कम्पनीको रू.३९०,अरुण काबेली पावरको रू. ५१९ र हिमालयन पावर पार्टनरको शेयरमूल्य प्रतिकित्ता रू. ५२० पुगेको छ ।
