जेठ १४, वीरगञ्ज । कोरोना संक्रमणसँग सामाना गरिरहेका केही बिरामीमा पछिल्लो समय ब्ल्याक फङ्गस (कालोढुसी) को देखिएको चिकित्सकहरूले बताएका छन् ।
कोरोना संक्रमण जितेर अस्पतालबाट डिस्चार्ज भइसकेकाहरू ब्ल्याक फङ्गसको समस्या लिएर आउने गरेको नारायणी अस्पताल वीरगञ्जका चिकित्सक डा निरज सिंहले जानकारी दिए ।
नेपाली युवा उद्यमी फोरम वीरगञ्जले शुक्रवार ब्ल्याक फङ्गस संक्रमणबारे चिकित्सकहरूसित गरेको भर्चुअल अन्तरक्रियामा डा सिंहले ब्ल्याक फङ्गसको उपचार अत्यन्तै जटिल रहेको बताए । औषधी सहजै उपलब्ध नहुने र लामो समयसम्म उपचार गर्नुपर्ने भएकाले यो चुनौतिपूर्ण रहेको उनले बताए ।
औषधी अभावमा वीरगञ्जमा भेटिएका संक्रमितलाई उपचारका लागि भारतका विभिन्न शहरका अस्पतालमा पठाउनु परेको डा सिंहको भनाइ छ । वीरगञ्जमा उपचारका लागि आएकामध्ये आठ जनामा यस्तो संक्रमणको लक्षण देखिएकोमा अहिलेसम्म २ जनाको ज्यान गइसकेको रचिकित्सकहरूले बताएका छन् ।
संक्रमण शरीरको कुन अंगमा छ त्यसका आधारमा लक्षण फरक फरक देखिने चिकित्सकहरूको भनाइ छ । सामान्यत : नाकबाट पानी बग्ने, आँखा सुन्निने, आँखा र टाउको दुख्ने, आँखा धमिलो देखिने र दृष्टि गुमाउनेजस्ता लक्षण देखिने डा नितीन तुल्स्यानले बताए ।
केही संक्रमितमा नाकबाट रगत बग्ने, मुख बांगो हुने, आँखाको वरपर कालो दाग देखिने, आँखाबाट रगतजस्तो पदार्थ बग्नेजस्ता लक्षण पनि देखिने पनि चिकित्सहरू बताउँछन् ।
संक्रमण मस्तिस्कसम्म फैलिएको छ भने उच्च ज्वरो आउने, अनुहार सुन्निने, नाक जाम हुने, फोक्सोमा संक्रमण भएमा खोकी लाग्ने, सास फेर्न कठिन हुने छाती दुख्नेजस्ता जटिल लक्षण देखिने डा. सिंहले जानकारी दिए । पेट दुख्ने, बान्ता, पनि यो संक्रमणको लक्षण भएको उनले बताए ।
फङ्गसको संक्रमणमा मुत्यु दर ५० देखि ६० प्रतिशतसम्म रहने डा. चन्दन बरनवालले जानकारी दिए । विगतमा अनियन्त्रित मधुमेह र एचआईभी संक्रमितमा विरलै देखिने यो संक्रमण अहिले वीरगञ्ज र काठमाडौंमा कोरोना संक्रमितमा भेटिएको उनले बताए ।
ब्ल्याक फङ्गस हाम्रै वातावरणमा रहेको माटो, बोटविरुवा, कुहिएका फलफूल र तरकारीमा पाइने भएकाले सरसफाइमा ध्यान दिनुपर्ने सुझाव चिकित्सकहरूको छ । यो संक्रमण मानिसबाट मानिसमा नसर्ने डा बरनवालले बताए ।
अन्तरक्रियामा युवा उद्यमी फोरमका अध्यक्ष अनुप अग्रवालले कोरोना महामारी र यसै बेला थपिएको फङ्गसको संक्रमणबाट जोगिन सबै पक्षको सतर्कता र सहकार्य आवश्यक भएको औंल्याए ।
उक्त अवसरमा नेपाल उद्योग वाणिज्य महासंघ प्रदेश २ का अध्यक्ष गणेशप्रसाद लाठ र वीरगञ्ज उद्योग वाणिज्य संघका अध्यक्ष सुवोधकुमार गुप्ताले महामारी नियन्त्रण र सचेतना अभिवृद्धिमा स्वास्थ्यकर्मीहरूको योगदानको प्रशंशा गरेका थिए ।
