रोल्पा (अस) । रोल्पाको रुन्टिगढी गाउँपालिकाको अध्यक्षमा नेपाली कांग्रेसले जितेको छ । गाउँपालिका अध्यक्षमा कांग्रेसका जनक पुन ४ हजार ३ सय ९१ मतका साथ विजयी भएका हुन् । नेकपा माओवादी केन्द्रका गोविन्द पुनले ३ हजार ७ सय ८ मत पाउँदा नेकपा एमालेका यामबहादुर दशौंदीले ३ हजार ५ सय ८७ मत पाएका छन् ।
उपाध्यक्षमा पनि कांग्रेसकै सरिता केसीले ४ हजार ४ सय ३७ मतसहित जितेकी हुन् । एमालेकी हस्तमाली बाँठाले ३ हजार ७ सय ८ र माओवादीकी कौशिला जिसीले ३ हजार ६ सय २८ मत पाइन् । यसअघि नेकपा एमालेले जितेको यो गाउँपालिकामा ९ वडा छन् ।
यसैगरी अघिल्लो निर्वाचनमा नेपाली कांग्रेसले जितेको रोल्पाकै लुङ्ग्री गाउँपालिकाको अध्यक्षमा माओवादी केन्द्र विजयी भएको छ । माओवादी केन्द्रका भरतकुमार थापा ४ हजार ९ सय ६४ मतका साथ विजयी भएका हुन् । उनका प्रतिस्पर्धी नेपाली कांग्रेसका जनक खड्काले ४ हजार २ सय ४९ मत पाए । गाउँपालिकाको उपाध्यक्षमा पनि माओवादी केन्द्रकै दिलकुमारी गुरुङले जितेकी छन् । गुरुङले ४ हजार ७ सय ४० मत पाउँदा कांग्रेसकी मुन्नीदेवी रोका क्षेत्रीले ४ हजार २ सय ६६ मत पाइन् ।
यस्तै जिल्लाको सुनछहरी गाउँपालिकामा समेत माओवादी केन्द्र विजयी भएको छ । अध्यक्षमा माओवादीका धनबहादुर पुनमगर ३ हजार ४ सय ३९ मतसहित विजयी भएका हुन् । उनका प्रतिस्पर्धी स्वतन्त्र उम्मेदवार पुस्तमन घर्तीमगरले १ हजार ५ सय २३ मत पाए । भाजबहादुर घर्तीमगरले १ सय ८१ मतसहित तेस्रो भएका हुन् ।
यस्तै उपाध्यक्षमा पनि माओवादी केन्द्रकी ननकला घर्तीमगर विजयी भएकी छिन् । उनले ३ हजार ४ सय ९२ मत पाउँदा उनका निकटतम प्रतिस्पर्धी नेपाली कांग्रेसका कोमबहादुर बुढाले १ हजार ६ सय ११ मत पाए । तेस्रो भएको रतीमाला घर्तीले १ सय ७३ मत ल्याइन् । यहाँ कांग्रेस–एमाले र विप्लव समूहबीच गठबन्धन भएको थियो ।
