चैत २४, काठमाडौं । साताको अन्तिम कारोबार दिन नेप्से परिसूचक बढेर बन्द भएको छ । यस दिन नेप्से परिसूचक ३५ दशमलव ६६ अंक बढेर २ हजार ४६४ दशमलव ३१ विन्दुमा पुगेको हो ।
गत बुधवार मात्र बढेको बजार त्यपछि लगातार घटेको थियो । लगातार पाँच दिनसम्म बजार घटिसकेपछि सस्तो मूल्यमा शेयर खरीद गर्न लगानीकर्ताहरू आकर्षित भएपछि बिहीवार बजार बढेको बजार विश्लेषकहरूले बताएका छन् ।
अहिले कम्पनीको मूल्य आम्दानी अनुपातलाई हेर्दा पनि शेयर मूल्य धेरै नै सस्तिएको देखिन्छ । त्यसैले गर्दा खरीदकर्ता आर्कषित भएका हुन् ।
बैशाख लागेसँगै सूचीकृत कम्पनीहरुले तेस्रो त्रैमासीक वित्तीय विवरण सार्वजनिक गर्नेछन्। निर्वाचनको मिति नजिकिंदैछ । नयाँ बजेटको तयारी पनि शुरु भएकाले चालू आवको सरकारी खर्च वृद्धि हुन थालेको छ । यी याबत कारणले गर्दा पनि शेयर बजार बढ्न सक्ने शेयर विश्लेषकहरु बताउँछन् ।
प्राविधिक शेयर विश्लेषक विष्णु प्रसाद बस्यालले विगत आठ महीनाको बजार ट्रेण्ड हेर्दा बजारले न्यून विन्दुको टेवा पाइसकेकाले अव बजार बिस्तारै अप ट्रेण्डमा जाने बताए ।
बुधावार परिसूचक बढेसँगै कारोबार रकममा पनि वृद्धि भएको छ । यस दिन कारोबारमा आएका २२४ धितोपत्रको ५४ लाख ४४ हजार ७३८ कित्ता शेयरको ४२ हजार ५०६ पटकमा रू. २ अर्ब १२ करोड १५ लाख ११ हजार २७९ बराबरको शेयर खरीदविक्री भएको छ ।
कारोबारमा आएका २२४ धितोपत्र मध्ये दुई धितोपत्रको मूल्यमा सकारात्मक सर्किट लागेकोछ । हिमालयन पावर पार्टनर र नेष्डो समृद्ध लघुवित्त वित्तीय संस्थाको शेयरमूल्य अघिल्लो कारोबार दिनको तुलनामा १० प्रतिशत वृद्धि भएसँगै सकारात्मक सर्किट लागेको हो ।
हिमालयन पावर पार्टनरको शेयर मूल्य प्रतिकित्ता रू. ४६२ र नेष्डो समृद्ध लघुवित्तको रू. १ हजार ७०० पुगेको हो । त्यसैगरी बिहिवार सबैभन्दा बढी राष्ट्रउत्थान लघुवित्त वित्तीय संस्थाका शेयरधनीले गुमाएका छन् । कम्पनीको शेयर मूल्य ७ दशमलव ७१ प्रतिशत घटेसँगै धेरै गुमाएका हुन । शेयर मूल्य प्रतिकित्ता रू. १ हजार ५३२ मा झरेको हो ।
त्यसैगरी दोस्रोमा इमर्जिङ नेपालको शेयर मूल्य ६ दशमलव ६१ प्रतिशत घटेर प्रतिकित्ता रू. १ हजार ११२ कायम भएको हो ।
सर्वाधिक शेयर खरीदविक्री नबिल बैंकको रू. ७ करोड ३८ लाख बराबरको भएको हो । त्यसैगरी दोस्रोमा प्राइम कमर्सियल बैंकको रू. ६ करोड ७१ लाख बराबरको शेयर खरीदविक्री भएको छ। कारोबारमा आएका १३ ओटै समूहको समूहगत परिसूचक बढेसँगै नेप्से परिसूचक बढेको हो ।
