न्यूयोर्क (अमेरिका) । अन्तरराष्ट्रिय बजारमा कच्चा तेलको भाउ घटेको छ । रुस र युक्रेनबीच युद्धबिरामका लागि भइरहेको वार्तामा सकारात्मक टिप्पणीहरुले लगानीकर्ताहरुलाई राहत दिएपछि तेलको भाउ सोमबार १०३ डलरसम्म आएको हो ।
अमेरिकी केन्द्रीय बैंक फेडरल रिजर्भ (फेड)ले ब्याजदर बढाउने अपेक्षामा अमेरिकी ट्रेजरीको प्रतिफल साढे २ वर्षकै उच्च बिन्दुमा उक्लिँदा पनि तेल बजारले टेवा पाएको हो । युद्ध अन्त्यसम्बन्धी वार्ताबारे आइतबार रुस र युक्रेनी अधिकारीहरुले अहिलेसम्मकै सकारात्मक अभिव्यक्ति दिएका थिए ।
केही दिनभित्रै मस्यौदा सम्झौतामा पुग्न सकिने वार्ताका केही प्रतिनिधिहरुको भनाइ छ । वार्तामा सहमति हुने अपेक्षा सोमवार तेलको अन्तरराट्रिय बेञ्चमार्क ब्रेन्ट क्रुडको भाउ ८ प्रतिशतसम्म घटेर २ हप्तायताकै न्यून स्तरमा आएको थियो ।
तर बजार बन्द हुँदासम्म कमी ६ दशमलव ८२ प्रतिशतमा सीमित भयो । अमेरिकी बेञ्चमार्क वेष्ट टेक्स इन्टरमिडियटको भाउमा पनि सोमबारको कारोबारमा ८ प्रतिशतसम्मको कमी आएको थियो । तर कारोबार बन्द हुँदा सम्म यो कमी घट्यो ।
रुस र युक्रेनबीचको नयाँ वार्ताको खबरको साथै चीनमा कोभिड नियन्त्रण गर्न ताजा लकडाउनको खबरले हप्ताको पहिलो दिनको कारोबारमा तेलको भाउ घटाएको विश्लेषकहरुले बताएका छन् । ओमिक्रोनको प्रकोप देखिएपछि उत्तरपूर्वी चीनको एउटा प्रान्तले लकडाउन लगाएको छ ।
लगानीकर्ताहरुले रुसमाथि लगाइएको प्रतिबन्धको प्रभाव विस्तारै पचाउन लागेकोले पनि तेलको भाउमा क्रमिक सुधारर आइरहेको वित्तीय सेवा प्रदायक कम्पनी सीएमसी मार्केट्सकी विश्लेषक टिना तेङ बताउँछिन् ।
यो हप्ता फेडले ब्याजदर बढाउने अपेक्षा गरिएको छ । ब्याजदर बढ्ने आशामा हालैका दिनमा डलरको भाउ बढेको छ । यसले पनि गैर डलरवाहकका लागि डलरमा किनबेच हुने तेल महँगो भएर माग घट्दा भाउमा कमी आएको विश्लेषण पनि छन् ।
रुस - युक्रेन बीच शान्तिको आशा बढ्दा मुद्रा डालोमा आबद्ध मुद्राको तुलनामा डलरको भाउ घटेको थियो । तर यो अझै पनि गत हप्ता कायम भएको २१ महीनाकै उच्च स्तर नजिक छ । सेफ हेभन एसेट सुनको भाउ घटेको थियो भने यूएस ट्रेजरीको प्रतिफल बढयो । एजेन्सी
