बाँके । पश्चिम नेपालमै कोरोना उपचार केन्द्र बनेको नेपालगञ्जस्थित भेरी अस्पतालमा जडान गरिएको अक्सिजन ट्यांकमा मंगलवार लिक्विड अक्सिजन भण्डारण गरिएको छ ।
अस्पतालमा उपचाररत कोरोना संक्रमित बिरामीलाई अक्सिजन अभाव हुन नदिन जडान गरिएको अक्सिजन ट्यांकमा लिक्विड अक्सिजन भण्डारण गरिएको भेरी अस्पतालका प्रमुख मेडिकल सुपरिटेन्डेन्ट डा. प्रकाश थापाले बताए ।
उनका अनुसार भारतबाट मंगलवार दिउँसो आइपुगेको ‘अक्सिजन लिक्विड’ बोकेको ट्यांकरबाट अस्पताल परिसरमा जडान गरिएको ट्यांकीमा लिक्विड अक्सिजन भण्डारण गरिएको हो । ट्यांकरमा आएको २० हजार लिटर लिक्विड अक्सिजनमध्ये १० हजार लिटर भेरी अस्पतालको ट्यांकीमा भण्डारण गरिएको छ भने बाँकी १० हजार लिटर नेपालगञ्ज मेडिकल कलेज शिक्षण अस्पताल कोहलपुरका लागि पठाइएको छ ।
अस्पतालको अक्सिजन ट्यांकीमा अक्सिजन भण्डारण भएपछि कोरोनाका बिरामीलाई उपचार गर्न अब सहज हुने डा. थापाको भनाइ छ । कोरोनाको दोस्रो लहरमा बिरामीलाई अक्सिजन अभाव भएपछि भेरी अस्पतालमा २० हजार लिटर अक्सिजन लिक्विड भण्डारण क्षमताको अक्सिजन ट्यांकी जडान गरिएको हो ।
कोरोना महामारीका कारण अस्पतालमा अक्सिजन अभावको अवस्था आएपछि यो समस्यालाई दीर्घकालीन रूपमा समाधान गर्न अक्सिजन ट्यांकी जडान गरिएको अस्पताल विकास समितिका अध्यक्ष प्रमोद धितालले बताए ।
भेरी अस्पतालको कोभिड वार्डमा बिरामीको चाप बढेसँगै अक्सिजनको माग पनि बढेको छ । भेरी अस्पतालमा दिनमा दुई सय ५० देखि तीन सय थान अक्सिजन सिलिन्डर खपत भइरहेको भेरी अस्पतालका प्रमुख मेडिकल सुपरिटेन्डेन्ट डा. थापाले जानकारी दिए ।
उनका अनुसार, सामान्य अवस्थामा अस्पतालमा दिनमा १० देखि १५ वटा ठूला अक्सिजन सिलिन्डर मात्रै प्रयोग हुने गरेकामा कोभिडका धेरै बिरामीमा अक्सिजनको माग बढेकाले खपत पनि बढेको हो । अस्पतालमा रहेका अधिकांश बिरामी अहिले अक्सिजनसहित उपचार कक्षमा छन् ।
एउटा अक्सिजन सिलिन्डरका लागि ९ सय १५ खर्च हुन्छ । नेपालगञ्जमा दुई वटा मात्रै अक्सिजन सिलिन्डर आपूर्तिकर्ता छन् । ती दुवैले भारतको एउटै कम्पनीबाट तरल अक्सिजन आपूर्ति गरी सिलिन्डर भरेर नेपालगञ्जका विभिन्न अस्पतालमा दिने गरेका छन् ।
कोरोना भाइरस संक्रमित बिरामीको शरीरमा अक्सिजनको मात्रा घट्दै जाँदा अक्सिजन दिएर बचाउन सकिने डा. थापाको धारणा छ । रासस
