पुस १२, बैतडी । संस्कृति, पर्यटन तथा नागरिक उड्ययन मन्त्रालयले सुदूरपश्मि प्रदेशका विभिन्न विमानस्थलको लागि १ अर्ब रुपैयाँभन्दा बढी बजेट विनियोजन गरेको छ ।
पर्यटन मन्त्री प्रेमबहादुर आलेको अध्यक्षतामा आइतवार बसेको बैठकबाट विमानस्थलको सुदृढिकरण, सम्भाव्यता अध्ययन र स्तरोन्नतिको लागि १ अर्ब ३२ करोड १२ लाख ५९ हजार ३६२ रुपैयाँ बजेट विनियोजन गरिएको छ ।
बैठकले धनगढी विमानस्थललाई क्षेत्रिय विमानस्थलको रुपमा स्तरोन्नति गर्नको लागि १ अर्ब रुपैयाँ, डोटी विमानस्थलको २५० मिटर धवनमार्ग थप गर्न, टर्मिनल टावर बनाउन र जमिन अधिग्रहणको लागि १८ करोड ६१ लाख ४७ हजार १०० रुपैयाँ र साफेवगर विमानस्थलको लागि ३ करोड रुपैयाँ बजेट विनियोजन गरिएको छ ।
त्यस्तै, कमलवजार विमानस्थल र महेन्द्रनगर विमानस्थल सुदृढीकरणको लागि क्रमशः ३ कारोड, २ करोड ५१ लाख ३२ हजार ७४३ रुपैयाँ र बैतडीको पाटनस्थित बैतडी विमानस्थल स्तरोन्नतिका लागि १ करोड ५० लाख ४४ हजार २४७ रुपैयाँ बजेट विनियोजन भएको छ । बहुबर्षीय आयोजना अन्तर्गत सो बजेट विनियोजन भएको हो ।
दार्चुलाको गोकुलेश्वर विमानस्थलका लागि २ करोड ६५ लाख ४८ हजार ६७२रुपैयाँ, बझाङ विमानस्थलको लागि १२ लाख ९९ हजार २०० रुपैयाँ, बाजुरा विमानस्थलको लागि १८ लाख ७६ हजार ३००रुपैयाँ र डडेल्धुरा विमानस्थलको सम्भाव्यता अध्ययनको लागि ५० लाख रुपैयाँ बजेट विनियोजन गरिएको छ ।