पुस २१, हेटौँडा । मकवानपुरगढी गाउँपालिकाले कृषिमा आत्मनिर्भर बनाउन रैथानेबाली प्रवर्द्धन कार्यक्रम कार्यान्वयनमा ल्याएको छ ।
पछिल्लो समय गाउँपालिकाका विभिन्न स्थान आन्तरिक पर्यटकको गन्तव्य बनेसँगै पर्यटनलाई कृिषसँग जोड्दै कार्यक्रम ल्याइएको जानकारी दिइएको छ ।
गाउँपालिकाको कार्यालयले पालिकाभित्र सञ्चालित होटल, घरवास (होमस्टे), रेष्टुरेन्ट तथा खाजाघरका सञ्चालकलाई कोदो र फापरको परिकार बनाउनको लागि तालिम दिन शुरु गरेको छ ।
गाउँपालिकाको आर्थिक वर्ष २०७८/७९ को वार्षिक कार्यक्रम अनुसार कृषि विकास कार्यक्रम संघीय सशर्ततर्फ ‘रैथाने बाली प्रवर्द्धन कार्यक्रम’ कार्यान्वयनमा ल्याएको हो ।
प्रशासकीय अधिकृत रामकुमार पुडासैनीले पालिकालाई दूध, तरकारी तथा अन्नबालीमा आत्मनिर्भर बनाउन विभिन्न कार्यक्रम ल्याइएको जानकारी दिए ।
उनका अनुसार यसअघि गाउँपालिकाले गाउँपालिकामा रहेको सहकारीमार्फत किसानको कृषि उपज (तरकारी तथा फलफूल) संकलन र बजारीकरणको सुरुआत गरेकोे छ । यसको साथै गाउँपालिकाले किसान क्रेडिटकार्डलगायतका विभिन्न नमूना कार्यक्रम कार्यान्वयनमा ल्याएको छ ।
सहकारीमार्फत अनाज खरीदविक्रीको कार्य गत आर्थिक वर्ष २०७७/७८ बाटै सुरुवात गरिएकोमा चालू आवमा तरकारी तथा फलफूलमासमेत बजारीकरणमा प्रोत्साहन अनुदानको कार्यक्रम शुरु गरिएको कृषि विकास शाखा प्रमुख चन्द्रकान्त चौधरीले जानकारी दिए । यस कार्यक्रमले स्थानीय किसानलाई खेती गर्न हौसला मिलेको उनको भनाइ छ ।
गाउँपालिकाभरिमा यसवर्ष अनाज, तरकारी तथा फलफूल बजारीकरणका लागि सात ओटा सहकारी संस्था सूचीकृत भएकोमा कुर्ले कृषि सहकारी संस्थाले संकलन र बजारीकरणको काम थालिसकेका छन् ।
रैथानेबाली प्रवर्द्धन कार्यक्रम अन्तर्गतको तालिममा सहभागिताका लागि गाउँपालिकाले किसानलाईआग्रह समेत गरेको छ । रासस
