साउन १७, काठमाडौं । साताको पहिलो कारोबार दिन आइतवार बजार समान्य अंकले वृद्धि भएको छ ।
कारोबारमा आएका २२६ ओटा कम्पनीमध्ये छ ओटा कम्पनीको शेयरमूल्यमा सकारात्मक सर्किट लागेको हो ।यो दिन अधिकांश हाइड्रोपावर कम्पनीको शेयरमूल्यमा वृद्धि भएको छ । सोही कारण हाइड्रोपावरका शेयरधनीले सर्वाधिक कमाएका छन् ।
यो दिन सर्किट लागेको छ ओटा कम्पनीमध्ये जीवन विकास लघुवित्त बाहेक पाँच ओटा हाइड्रोपावर कम्पनी रहेका छन् । यो दिन सिनर्जी पावर डेभलपमेण्ट लिमिटेड,कालिका पावर कम्पनी लिमिटेड, घलेम्दी हाइड्रो लिमिटेड,युनिर्भसल पावर कम्पनी लिमिटेड,ग्रीन लाइफ हाइड्रोपावर लिमिटेड र जीवन विकास लघुवित्त वित्तीय संस्थाको शेयरमूल्यमा सकारात्मक सर्किट लागेको हो ।
ती छ ओटै कम्पनीको शेयरमूल्य अघिल्लो कारोबार दिनको तुलनामा आइतवार १० प्रतिशतले वृद्धि भएको हो । विक्रेताभन्दा क्रेता धेरै भएकाले ती कम्पनीहरुको शेयरमूल्य बढेको हो ।
सिनर्जी पावरको शेयरमूल्य प्रतिकित्ता रू. ६६५ दशमलव ५०,कालिका पावरको रू.६४३ दशमलव ५०,घलेम्दी हाइड्रोको रू.३८६ दशमलव १०,युनिभर्सल पावरको रू. ४५३ दशमलव २०,ग्रीन लाइफ हाइड्रोको रू. ५३९ र जीवन विकास लघुवित्तको शेयरमूल्य प्रतिकित्ता रू. १ हजार ८८ पुगेको हो ।
ती छ ओटा कम्पनीबाहेक अधिकांश हाइड्रोपावर कम्पनीको शेयरमूल्यमा वृद्धि भएको छ । ङादी ग्रुप पावरको शेयरमूल्य अघिल्लो कारोबार दिनको तुलनामा ९ दशमलव ८३ प्रतिशतले वृद्धि भएको हो ।
कम्पनीको शेयरमूल्य प्रतिकित्ता रू. ९६९ दशमलव ८० पुगेको छ । त्यसैगरी सीईडीबी हाइड्रोपावर कम्पनीको शेयरमूल्य अघिल्लो कारोबार दिनको तुलनामा ९ दशमलव ६३ प्रतिशत र रैराङ हाइड्रोपावर कम्पनीको शेयरमूल्य ९ दशमलव ४५ प्रतिशतले वृद्धि भएको छ ।
