पारा तेक्वान्दोकी पलेशा गोवर्द्धनले टोकियो पारा ओलम्पिकमा निकै नजिक पुगेर पदक गुमाएकी छन् । टोकियोस्थित माकुहारी मासे हलमा शुक्रबार के४४ विधाको महिला ५८ केजीमुनि तौलमा कांस्य पदकलाई भएको फाइनलमा विश्व वरीयताको दोस्रो स्थानकी चिनियाँ खेलाडी युजी लीसँग १२–९ अंकको झिनो अन्तरमा पराजित भएपछि पलेशा पदकविहीन हुनुपरेको हो । पहिलो राउन्डमा ४–२ को अग्रता बनाएकी उनले दोस्रो राउन्ड ५–० ले गुमाइन् । पलेशाले फाउल गर्दा लीलाई थप फाइदा भयो ।
