वैशाख २२, काठमाडौं । नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल प्रचण्डले चितवनका कांँग्रेस कार्यकर्ताले अहिले हँसिया हथौडामा भोट हाल्न गाह्रो माने देश दुर्घटनामा जाने बताएका छन् ।
बिहीवार चितवनमा आयोजित चुनावी सभालाई सम्बोधन गर्दै प्रचण्डले रेणु दाहाललाई जिताउन हँसिया हथौडामा भोट नहाले देश दुर्घटनामा जाने बताएका हुन् ।
उनले संघीयता विरोधीलाई परास्त गर्न गठबन्धन आबश्यक रहेको भन्दै प्रचण्डले भने 'रुखवालाले हँसिया हथौडामा भोट हाल्न निकै गाह्रो देखें, अहिलेको परिवेषमा हसिंया हथौडामा भोट हाल्न गाह्रो मान्नु भयो भने देश दुर्घटनामा जान्छ ।'
आफू एकातिर गतिशिलि र अर्कोतिर आफू अस्थिर देखिएपनि सबैलाई सकारात्मक पक्षले हेर्न आग्रह गरे।
‘यो गठबन्धन राष्ट्रको, जनताको आवश्यकता हो र लोकतन्त्र र विकास समृद्धिको आवश्यकता हो ।’ उनले भने । गठबन्धनलाई जिताएको खण्डमा यो गठबन्धन १०, १५ वर्षसम्म जाने उनले बताए ।
केपी ओलीको निरंकुश प्रवृत्तिलाई परास्त गर्न गठबन्धन गर्न आवश्यक रहेको उनको भनाइ छ । उनले कांँग्रेसका असन्तुष्ट पक्षलाई ईंगित गर्दै गठबन्धनमा साथ दिन गरे।
‘लकिरको फकिर भएर लोकतन्त्रको रक्षा हुंँदैन उनले भने, सहकार्य सहमति, मेलमिलाप अहिलेपनि आवश्यक छ ।’
केपी ओली कुहिएको फर्सी हुन् : माधव नेपाल
नेकपा एकीकृत समाजवादीका अध्यक्ष माधवकुमार नेपालले केपी ओलीलाई कुहिएको फर्सीको संज्ञा दिएका छन्। भरतपुरमा आयोजित पाँच दलीय गठबन्धनको चुनावी सभालाई सम्बोधन गर्दै पूर्वप्रधानमन्त्रीसमेत रहेका नेता नेपालले भने, हिजो आफूले नै फलाएको फर्सी आज कुहिएको र त्यो कुहिएको फर्सी खान नहुने बताए ।
केपी ओलीको गफमा नभुल्न पनि उनले चितवनवासीलाई आग्रह गरे। ‘केपी ओलीले गफमा विद्यावारिधी गरेका छन्। त्यसैले गफमा जति पनि भुलाउन सक्छन्। त्यसैले ओलीको भ्रममा कोही पनि नपर्नुहोला। समयमा भुल्नुभयो भने फुर्सदमा पछुताउनुपर्छ,’ उनले भने।
दलहरूबीचको एकताबाटै राजसंस्था फाल्न सफल भएको भन्दै उनले थपे, ‘संविधान र गणतन्त्र जोगाउन पनि पाँच दलीय गठबन्धन र एकता आवश्यक परेको हो।’ दुई पटकसम्म संसद विघटन गर्दा प्रतिपक्षी भएर नउभिएको भए देश समाप्त भइसक्ने उनले दाबी गरे ।
‘केपी ओलीको प्रतिगमनकारी कदममा हामी विरोधी नभएको भए गणतन्त्र समाप्त हुने थियो। संविधान र लोकतन्त्र कागजमा सीमित हुने थियो,’ उनले भने, ‘देश भ्रष्टाचारमा चुर्लुम्म डुब्ने थियो ’
