काठमाडौं (अस) । गत आर्थिक वर्षमा रू. ८ अर्ब ७७ करोड बराबरको आलु आयात भएको छ । विगत १३ वर्षको तथ्यांकको विश्लेषण गरी हेर्दा यस अवधिमा आलु आयातको औसत वार्षिक वृद्धिदर करीब ३३ प्रतिशत रहेको छ । कृषि श्रमिकको कमी, आलु खेती योग्य कृषि भूमिको विनाश, बढ्दो भूमि मूल्य, ठूला कृषकलाई शोषक–सामन्त भन्दै असुरक्षा उत्पन्न गर्ने राजनीतिक प्रवृत्ति, ग्रामीण क्षेत्रमा बढ्दो असुरक्षा, अराजकता एवं कृषिमा ठूलो अनुदानयुक्त मुलुकको आलु उत्पादन रणनीतिका कारण स्वदेशमा माग बमोजिम आलु उत्पादन हुन सकेको छैन । यसले आलुको आयातमा यसप्रकारको वृद्धि देखिएको हो । यस परिस्थितिलाई दृष्टिगत गर्दै आलु उत्पादनमा सही रणनीति अवलम्बन गर्ने हो भने मुलुक केही वर्षभित्रै यसमा आत्मनिर्भर हुन सक्छ । यहाँ प्रस्तुत तथ्यांकले आलुखेतीमा व्यावसायिक लगानीको उज्ज्वल सम्भावना रहेको पुष्टि हुन्छ । यसका लागि सरकारले उचित वातावरण सृजना गर्नु आवश्यक छ ।
