माघ ३, काठमाडौं । त्रिभुवन विमानस्थल भन्सार कार्यालयले चालू आर्थिक वर्ष २०७८/७९ को ६ महीनाको अवधिमा कुल रू. १३ अर्ब ५६ करोड राजस्व संकलन गरेको छ ।
यस अवधिको लागि कार्यालयलाई तोकिएको राजस्व असुली लक्ष्य रू. ११ अर्ब ७२ करोडको तुलनामा संकलित राजस्व ११५ दशमलव ७ प्रतिशत हुन आउँछ ।
त्यसैगरी, गत आर्थिक वर्ष २०७७/७८ को प्रथम ६ महीनाको कार्यालयले गरेको राजस्व असुली रू. ८ अर्ब ४ करोडको तुलनामा चालू वर्षको सोही अवधीको राजस्व असुली ६८ दशमलव ६ प्रतिशतले वृद्धि भएको हो ।
पछिल्लो अवधिमा विशेषगरी विदेशबाट आयात हुने वस्तुको भन्सार जाँचपास गर्दा मूल्यांकनमा गरिएको सुधार एवम् यात्रुले ल्याउने सुन तथा सुनका गहना र मोबाईलको प्रभावकारी नियमनले गर्दा नै राजस्व असुलीमा यस किसिमको सफलता प्राप्त हुन सकेको हो ।
साथै, कर्मचारीको कार्यक्षमतामा अभिवृद्धि गर्नका लागि कार्यालयले आयोजना गरेका विभिन्न तालिमको कारणले पनि उनीहरूको कार्य सम्पादनमा बढोत्तरी हुँदै गएको छ ।
