पुस २१, काठमाडौं । एशियन लाइफ इन्स्योरेन्स कम्पनीले २०७६/७७ को मुनाफाबाट शेयरधनीलाई कुल २७ प्रतिशत लाभांश वितरण गर्ने प्रस्ताव गरेको छ ।
कम्पनीले २५ प्रतिशत बोनस शेयर र २ प्रतिशत नगद लाभांश कर सहित गरेर कुल २७ प्रतिशत लाभांश वितरण गर्ने प्रस्ताव गरेको हो । यो प्रस्ताव बीमा समितिबाट स्वीकृति पाएपछि र कम्पनीको आगामी साधारण सभाबाट पारित भएपछि शेयरधनीले पाउनेछन् ।
हाल कम्पनीको चुक्तापूँजी रू. २ अर्ब १ करोड ७ लाख रहेको छ । २५ प्रतिशत बोनस शेयर वितरण पछि उक्त पूँजी रू. २ अर्ब ५१ करोड ३४ लाख पुग्नेछ । कम्पनीले चालू आवको पहिलो त्रैमाससम्ममा रू. ९ करोड ६२ लाख ९४ हजार नाफा कमाएको छ ।
यो नाफा गत आवको पहिलो त्रैमासको तुलनामा २ दशमलव ३८ प्रतिशतले वृद्धि भएको हो । कम्पनीले गत आवको पहिलो त्रैमाससम्ममा रू. ९ करोड ४० लाख नाफा कमाएको थियो ।
कम्पनीले गत आवको पहिलो त्रैमाससम्ममा रू. १९ करोड ८६ लाख ६९ हजार आम्दानी गरेकोमा चालू आवको सोही अवधिमा घटेर रू. १३ करोड ४१ लाख ३८ हजारमा झरेको हो ।
चालू आवको पहिलो त्रैमाससम्ममा कम्पनीले जगेडामा रू. ९८ करोड ५९ लाख ३१ हजार र जीवन बीमा कोषमा रू. २७ अर्ब ९५ करोड २९ लाख सञ्चित गरेको हो । त्यसैगरी, सो अवधिमा कम्पनीले रू. १ अर्ब ५९ करोड ७० लाख कुल बीमाुशल्क आर्जन गरेको हो ।
यो बीमाशुल्क गत आवको पहिलो त्रैमासको तुलनामा भने ८ प्रतिशतले वृद्धि भएको हो । कम्पनीले सो अवधिमा रू. १ अर्ब ४७ करोड बीमाशुल्क आर्जन गरेको थियो । कम्पनीको प्रतिशेयर आम्दानी रू. १९ दशमलव १६ (वार्षिक) र प्रतिशेयर नेटवर्थ रू. १५४ दलशमव शून्य ३ रहेको छ ।
बुधवार कम्पनीको शेयरमूल्य प्रतिकित्ता रू. १ हजार १६९ दशमलव ९० कायम भएको छ । यो शेयरमूल्य अघिल्लो कारोबार दिनको तुनलामा १० रुपैयाँ १० पैसा घटेको हो ।
