काठमाडौं । माघ महीनाको पहिलो कारोबार दिन मंगलवार धितोपत्र दोस्रो बजार २ दशमलव ५७ प्रतिशत बढेर बन्द भएको छ । अघिल्लो कारोबार दिनको तुलनामा यो दिन नेप्से परिसूचक ५४ दशमलव ५४ अंकले बढेको हो । माघमा अधिकांश बैंकले ब्याजदर घटाएसँगै धितोपत्र दोस्रो बजारमा सकारात्मक प्रभाव परेको हो । मंगलवार नेप्से परिसूचक २ हजार १७५ दशमलव १७ विन्दुमा पुगेको छ ।
पुस मसान्त सकिएसँगै धेरैजसो कम्पनीले यस वर्षको वार्षिक साधारण सभा सम्पन्न गरी लाभांश पारित गरिसकेको अवस्था छ । यस वर्ष लाभांश नदिने कम्पनीको संख्या पनि धेरै छ । लाभांशको प्रभाव खासै नपरेको धितोपत्र बजारमा ब्याजदरको प्रभाव पर्ने पर्ने गर्दछ । बैंकमा निक्षेपको ब्याजदर घटेसँगै धितोपत्र बजारमा लगानी बढ्ने गरेको ब्रोकरहरू बताउँछन् । यतिबेला पुस मसान्तको कर्जा र ब्याज भुक्तानीको जिम्मेवारी पूरा गरिसकेका लगानीकर्ता थप उत्साहित बनेको ब्रोकरहरूको भनाइ छ । बजारले गतिलाई अघि बढाइरहेको अवस्थामा दीर्घकालिन लगानीलाई जोड दिन सके बजारले थप गति लिने विश्वास समेत ब्रोकरहरूको छ ।
लगानीकर्ता उत्साहित बनेसँगै मंगलवार ८ अर्ब २ करोड ३८ लाख रुपैयाँभन्दा बढीको धितोपत्र कारोबार भएको छ । उक्त रकम बराबरको २ करोड ३३ लाख ७० हजारभन्दा बढी धितोपत्र कारोबार भएको जानकारी नेपाल स्टक एक्सचेञ्ज (नेप्से)ले दिएको छ । मङ्सिरदेखि बजारले गति लिन थालेको भएपछि कारोबार रकम मंगलवार उच्च बनेको हो । यस दिन कुल कारोबारमा सर्वाधिक हिस्सा सोनापुर मिनरल्स एण्ड आयल लिमिटेडले ओगटेको छ । यस कम्पनीको २८ करोड ३१ लाख ५५ हजार रुपैयाँभन्दा बढीको शेयर कारोबार भएको हो ।
सर्वाधिक रकमको कारोबार भएको यस कम्पनीको शेयर मूल्य भने २ दशमलव ७८ प्रतिशत अर्थात् प्रतिकित्ता १५ रुपैयाँले बढेर प्रतिकित्ता ५५४ रुपैयाँ कायम भएको छ । यो दिन २१४ धितोपत्रको मूल्य बढेको छ भने ३१ धितोपत्रको मूल्य घटेको छ । २० कम्पनीको शेयर मूल्य यो दिन ९ प्रतिशतभन्दा बढीले वृद्धि भएको छ । २० कम्पनीमध्ये बुटवल पावर कम्पनी, युनाइटेड मोदी हाइड्रोपावर, हिमालयन पावर पार्टनर, एनआरएन इन्फ्रास्ट्रक्चर एण्ड डेभलपमेन्ट र नेपाल वेयरहाउजिङ कम्पनी लिमिटेडको शेयर मूल्य भने १० प्रतिशतले बढेको हो ।
बढेको बजारमा सबै समूहगत परिसूचकसमेत बढेका छन् । यो दिन वित्त समूहको परिसूचक सर्वाधिक ४ दशमलव ७५ प्रतिशत बढेको छ । त्यस्तै लगानीको ३ दशमलव ७० प्रतिशत, जलविद्युतको ३ दशमलव ५१ प्रतिशत, लघुवित्त ३ दशमलव शून्य २ प्रतिशत, विकास बैंक २ दशमलव ६३ प्रतिशत, अन्य २ दशमलव ६२ प्रतिशत, उत्पादन तथा प्रशोधन २ दशमलव ४९ प्रतिशत, व्यापारिक २ दशमलव १५ प्रतिशत, बैंकिङ २ दशमलव शून्य ३ प्रतिशत, निर्जीवन बीमा १ दशमलव ९२ प्रतिशत, जीवन बीमा १ दशमलव ७८ प्रतिशत, होटल तथा पर्यटन १ दशमलव १६ प्रतिशत र म्युचुअल फण्डको परिसूचक शून्य दशमलव ७८ प्रतिशत बढेको छ ।
मंगलवार धितोपत्र दोस्रो बजारको कुल पूँजीकरण ३४ खर्ब १६ अर्ब ४२ करोड ४१ लाख रुपैयाँ कायम भएको छ । अघिल्लो कारोबार दिन यो रकम ३३ खर्ब ३० अर्ब ७५ करोड रुपैयाँ थियो । एकै दिन धितोपत्र दोस्रो बजारको पूँजीकरण ८५ अर्ब ६७ करोड रुपैयाँभन्दा बढीले वृद्धि भएको हो ।
