माघ २२, काठमाडौं । यो साता नेप्से परिसूचक ९६ दशमलव ७६ अंकले बढेको छ ।
गत साताको अन्तिम कारोबार दिन २ हजार ७७९ दशमलव ९८ विन्दुमा रहेको नेप्से परिसूचक यो साताको अन्तिम कारोबार दिन २ हजार ८७६ दशमलव ७४ विन्दुमा बन्द भएको हो । आगामी जेठ भित्रै स्थानिय तहको निर्वाचन गर्ने सत्तारुढ दल सहमत भएको सुचना आएसँगै साताको पहिलो दिन नेप्से परिसूचक १०५ दशमलव ५५ अंकले बढेको थियो ।
दोस्रो दिन १३ दशमलव ४८ अंकले घटेको नेप्से परिसूचक तेस्रो दिन १९ दशमलव २९ अंकले बढेको थियो । चौथो दिन सार्वजनिक विदाका कारण बन्द भएको बजार अन्तिम कारोबार दिन १४ दशमलव ६० अंकले घटेर बन्द भएको हो । यो साता ठूला कम्पनीहरुको मात्र कारोबार मापक सेन्सेटिभ इन्डेक्स २० दशमलव ९३ अंकले बढेर ५३९ दशमलव ६५ विन्दुमा पुगेको छ । गत साता सेन्सेटिभ इन्डेक्स ५१८ दशमलव ७२ विन्दुमा थियो ।
यो साता चार कारोबार दिनमात्र बजार सञ्चालन भएकाले कारोबार रकम र कित्तामा भने कमि आएको छ । गत साता पाँच कारोबार दिनमा रू. २८ अर्ब ९७ करोड १२ लाख ६१ हजार बराबरको ५ करोड ७५ लाख ८६ हजार ६९२ कित्ता शेयर कारोबार भएकोमा यो साता रू. २६ अर्ब ६६ करोड ५४ लाख ६८ हजार बराबरको ५ करोड २ लाख ९ हजार ४१९ कित्ता शेयर कारोबार भएको हो ।
गत साताभन्दा यो साता रू. २ अर्ब ३० करोड ५७ लाख ९३ हजार बराबरको ७३ लाख ७७ हजार २७३ कित्ता कम शेयर कारोबार भएको हो । नेप्से परिसूचक उकालो लागेको यो साता कुल बजार पूँजीकरण रू. १ खर्ब ३६ अर्ब ७३ करोड ८४ लाखले वृद्धि भएको छ । गत साता रू. ३९ खर्ब २८ अर्ब ६३ करोड ४२ लाख रहेको कुल बजार पू्ँजीकरण यो साता रू. ४० खर्ब ६५ अर्ब ३७ करोड २६ लाख पुगेको हो ।
पछिल्लो समय धितोपत्र दोस्रो बजारमा दिर्घकालिन लगानीकर्ताभन्दा अल्पकालिन लगानीकर्ताहरु कारोबारमा सक्रिय हुँदा बजारमा उतारचढाब देखिएको ब्रोकरहरुको भनाइ छ । बजार उच्च विन्दुबाट घटेर पुनः उकालो लागेको अवस्थामा आगामी चुनावी माहोलका विच बजारले ऐतिहासिक रेकर्ड कायम गर्ने विश्वासमा कारोबार रकम बढ्दै गएको जानकारी समेत ब्रोकरहरुले दिएका छन् ।
साथै गत भदौदेखि रिक्त रहेको धितोपत्र बजार सञ्चालक नेपाल स्टक एक्सचेञ्जको प्रमुख कार्यकारी अधिकृत(सीईओ) नियुक्ती प्रक्रियाले पनि पूर्णता पाएको छ । नेप्सेको सीईओमा आगामी चार वर्षे कार्यकालका लागि पाल्पाका कृष्णबहादुर कार्कीलाई नियुक्त गर्ने निर्णय माघ १७ गतेको मन्त्रिपरिषदको बैठकले गरिसकेको छ ।
कार्कीले धितोपत्र कारोबारको अनलाईन प्रणालीलाई व्यवस्थित बनाउँदै भित्रि कारोबारलाई रोक्ने प्रमुख योजनाका साथ जिम्मेवारी पुरा गर्ने प्रतिवद्धता व्यक्त गरेका छन् । बजारको नयाँ नेतृत्वले भावी दिनमा गर्ने कार्यलाई पनि आगामी साता लगानीकर्ताहरुले सकारात्मक रुपमा हेर्ने विश्वास सरोकारवालाहरुको रहेको छ ।
यो साता जलविद्युत् र लगानी समूहका लगानीकर्ताले सर्वाधिक कमाए
यो साता जलविद्युत् र लगानी समूहका लगानीकर्ताहरुले सर्वाधिक कमाएका छन् । गत साताको तुलनामा यो साता सबै समूहगत परिसूचकहरु बढेपनि जलविद्युत् समूहको सर्वाधिक ८ दशमलव ८ दशमलव ४९ प्रतिशत र दोस्रोमा लगानी समूहको ८ दशमलव १५ प्रतिशतले परिसूचक बढेको हो ।
त्यस्तै अन्य समूहको ५ दशमलव ४६ प्रतिशत, विकास बैंकको ४ दशमलव ८५ प्रतिशत, वित्त समूहको ४ दशमलव ६८ प्रतिशत, लघुवित्तको ३ दशमलव ७२ प्रतिशत, व्यापारिकको ३ दशमलव ३७ प्रतिशत, निर्जीवन बीमा समूहको २ दशमलव ७८ प्रतिशत, होटल्स तथा पर्यटन समूहको २ दशमलव ४९ प्रतिशतले बढेको छ ।
त्यस्तै, म्युचुअल फण्डको १ दशमलव ९० प्रतिशत, बैंकिङ्गको १ दशमलव ४७ प्रतिशत , जीवन बीमा समूहको शूून्य दशमलव ८६ प्रतिशत र उत्पादन तथा प्रशोधनको शून्य दशमलव ४७ प्रतिशतले परिसूचक बढेको छ ।
