काठमाडौं । अम्रिसोको मूल्य वृद्धि हुँदै गएपछि पूर्वी पहाडी क्षेत्रका किसान उत्साही भएका छन् । तीन वर्षअघि प्रतिकिलो ३५ रुपैयाँका दरले मुस्किलले विक्री गरेका ताप्लेजुङको खेवाङका नेत्र आचार्यले गत वर्ष प्रतिकेजी १२० रुपैयाँमा विक्री गरे । यो वर्ष पनि त्यही मूल्यमा खरीद भइरहेकाले थप मूल्य बढ्नसक्ने किसानले अनुमान गरेका छन् । यो भाउ तीन वर्षअघिको तुलनामा तेब्बर गुणाभन्दा बढी हो ।
मूल्यमा उतारचढाव आइरहे पनि यो वर्ष व्यापारीले किसानबाट प्रतिकिलो १०० देखि १२० रुपैयाँसम्ममा अम्रिसो खरीद गरिरहेका छन् । अम्रिसोको व्यापार गर्दै आएका स्थानीय रूपनारायण पाण्डेले प्रतिकिलो १२० रुपैयाँसम्म लगाएर १० क्विन्टल अम्रिसो संकलन गरेका छन् । झापाको धुलाबारीमा लगेर विक्री गर्दै आएका पाण्डेले यो वर्ष केही बढ्नसक्ने अनुमान गरेको बताए ।
पछिल्लो समय भारतबाट अम्रिसोको माग बढेपछि मूल्य बढेको व्यवसायीहरूको भनाइ छ । कुनै समय घाँस र कुचोका अम्रिसो रोप्ने पहाडी क्षेत्रका किसानले बजार र मूल्य पाउन थालेपछि व्यावसायिकरूपमा नै यसको खेती गर्न थालेका छन् । अम्रिसोको डाँठलाई दाउराका रूपमा र पातलाई घाँसका रूपमा प्रयोग गर्ने किसानले फुलेको भागलाई निकालेर कुचोका रूपमा विक्री गर्दै आएका छन् ।
बहुउपयोगी अम्रिसोले राम्रो मूल्य पाउन थालेकाले पहाडी भेगका किसानमा उत्साह छ । अन्नबालीका लागि उपयोग हुन नसक्ने भिरालो पाखा जमिनमा समेत अम्रिसो खेती गर्न सकिन्छ । हिउँदका समयमा अन्य घाँसपात नहुँदा अम्रिसोको पात गाईबस्तुका लागि निकै उपयोगी मानिन्छ । ग्रामीण भेगसम्म यातायातको पहुँच पुगेपछि यसको व्यावसायिक खेती बढेको हो । रासस
