चितवन । चितवनको भरतपुर महानगरमा निजी क्षेत्रको सहकार्यमा निर्माण गर्न लागिएको भरतपुर मेट्रो प्लाजा शिलान्यास गरिएको छ । नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ ले उक्त भवनको शिलान्यास गरे ।
भरतपुर मेट्रो प्लाजा भरतपुरका नागरिकको चेतना, संस्कार र सभ्यतालाई प्रतिविम्बित गर्ने प्रोजेक्ट भएको उनले बताए ।
भरतपुर मेट्रो प्लाजा निर्माणसँगै चितवनको समग्र विकासमा कोसेढुंगा सावित गर्ने बताउँदै दाहालले यो मोडल देशकै लागि नमुना हुने विश्वास व्यक्त गरे । सरकार निजी क्षेत्रप्रति उदार भएकाले देशमा ठूल्ठूला प्रोजेक्ट सञ्चालन हुने उनको धारणा थियो ।
कार्यक्रममा भरतपुर महानगर प्रमुख रेनु दाहाले आधुनिक सहरको सोच बोकेर अगाडि बढेको बताइन् । निजी क्षेत्रसँग सहकार्य गरेर अगाडि बढेको उनको भनाइ थियो ।
सार्वजनिक÷निजी साझेदारी (पीपीपी) मोडलमा निर्माण हुन लागेको भरतपुर मेट्रो प्लाजा बहुउद्देश्यीय भवन ३ वर्षमा निर्माण सम्पन्न गर्ने सम्झौता महानगरसँग भएको छ ।
भरतपुर महानगर र आर्या बिल्डर्स एन्ड इञ्जिनियरिङ प्रालिबीच गत साउन २४ गते सम्झौता भएको थियो । आर्या बिल्डर्सका कार्यकारी प्रमुख जीवनराज कँडेलले ३ वटा बेसमेन्ट पार्किङसहितको १४ तले सुविधासम्पन्न भवन बन्ने जानकारी दिए ।
भवनमा चिल्ड्रेन पार्क, कन्फ्रेन्स हल, पाँचतारे होटल, सिनेमा हल, फुड कोर्ट क्यासिनोलगायत संरचना रहनेछन् ।
महानगरको भरतपुर–३ स्थित नारायणगढ लायन्सचोकमा रहेको साढे ११ कठ्ठा जग्गामा करिब २ अर्ब रुपैयाँ लगानीमा भवन निर्माण हुन लागेको हो ।
