सरकारले मन्त्री निवास पुल्चोकलाई भत्काएर राजकीय अतिथिगृह र भैँँसेपाटीमा मन्त्री निवास बनाउने निर्णय सार्वजनिक गरिसकेको छ । २०२८ सालमा बनेका मन्त्री निवास अब भत्कने भएको छ । हाम्रो आवास विकास एवं सहरी विकास योजना अलपत्र रहेको कुरा विगतको भूकम्पपछिको भयावह स्थिति र पूर्वराष्ट्रपति सरकारी घरमा सरेकै दिन भाडाको घरको मर्मत सम्भार हुनुले पनि स्पष्ट पारेको थियो । भूकम्प कसैको वशमा थिएन, परन्तु भूकम्पपछि लाखौं नेपाली घरवारविहीन बने, हालसम्म लाखौं मानिसको अवस्था उस्तै छ । कठ्यांग्रिँदो यसपालिको जाडोको मौसम सकिँदा पनि भूकम्पपीडितको बास बनिसकेको छैन ।
