काठमाडौं । नेपाल स्टक एक्सचेन्ज (नेप्से) मा तीन कम्पनीको करीब २८ लाख कित्ता बोनस शेयर मंगलवार सूचीकृत भएको छ ।
नेपाल हाइड्रो डेभलोपर लिमिटेडको १ लाख ५९ हजार ९६५ कित्ता, सगरमाथा इन्स्योरेन्सको १६ लाख ५३ हजार ६९९ दशमलव ९६ कित्ता र लुम्बिनी जनरल इन्स्योरेन्सको ९ लाख १७ हजार ६४४ दशमलव ५० कित्ता बोनस शेयर सूचीकृत भएको हो ।
मंगलवार सूचीकृत भएको कुल २७ लाख ८१ हजार ३०९ कित्ता बोनस शेयर सम्बन्धित शेयरधनीहरूको हितग्राही खातामा आएपछि कारोबार गर्न सकिनेछ ।
नेपाल हाइड्रो डेभलोपरले पुस २९ गते सम्पन्न वार्षिक साधारण सभाबाट पारित ५ प्रतिशत बोनस शेयर सूचीकृत गराएको हो । त्यस्तै सगरमाथा इन्स्योरेन्स कम्पनीले फागुन ११ गते सम्पन्न वार्षिक साधारण सभाबाट पारित १२ दशमलव ४० प्रतिशत बोनस शेयर र लुम्बिनी जनरल इन्स्योरेन्स कम्पनीले पनि फागुन ११ गते सम्पन्न वार्षिक साधारण सभाबाट पारित ६ दशमलव ९९ प्रतिशत बोनस शेयर सूचीकृत गराएका हुन् ।
