काठमाडौं । हालसम्म आठ बीमा कम्पनीले मात्रै नेपाल बीमा प्राधिकरणले तोकेको चुक्ता पूँजी पुर्याएका छन् । निर्जीवनतर्फ पाँच र जीवनतर्फ तीन कम्पनीले नियामक निकायले तोकेको चुक्ता पूँजी पुर्याएका हुन् ।
जसमा निर्जीवनतर्फ हिमालयन एभरेष्ट इन्स्योरेन्स, सिद्धार्थ प्रिमियर इन्स्योरेन्स, सगरमाथा इन्स्योरेन्स, आइजिआई प्रुडेन्सियल इन्स्योरेन्स र शिखर इन्स्योरेन्स कम्पनी छन् । त्यस्तै जीवनतर्फ नेशनल लाइफ इन्स्योरेन्स, नेपाल लाइफ इन्स्योरेन्स र हिमालयन लाइफ इन्स्योरेन्स कम्पनी छन् ।
बीमा प्राधिकरणले जीवन बीमा कम्पनीलाई रू. ५ अर्ब र निर्जीवन बीमा कम्पनीको रू. २ अर्ब ५ करोड चुक्ता पूँजी पुर्याउन निर्देशन दिएको थियो । सोही अनुसार पूँजी वृद्धिका लागि केही कम्पनीले हकप्रद शेयर र बोनस शेयरको सहारा लिएका छन् । लाइफ इन्स्योरेन्स कर्पोरेशन, प्रभु महालक्ष्मी लाइफ इन्स्योरेन्स, सानिमा जिआईसी इन्स्योरेन्स, एशियन लाइफ इन्स्योरेन्स, सन नेपाल लाइफ इन्स्योरेन्स कम्पनीले पूँजी वृद्धि गर्न हकप्रद शेयर निष्कासनको तयारीमा छन् ।
लाइफ इन्स्योरेन्स कर्पोरेशन नेपालले हाल कायम चुक्ता पूँजीको ८८ दशमलव ४५१६८ प्रतिशत हकप्रद शेयर निष्कासन गर्ने तयारी थालेको छ । कम्पनीले नेपाल धितोपत्र बोर्ड (सेबोन)मा निवेदन दिइसकेको छ । हाल कम्पनीको चुक्ता पूँजी रू. २ अर्ब ६५ करोड छ । हकप्रद शेयर निष्कासन बाँडफाँटपश्चात कम्पनीको उक्त पूँजी रू. ५ अर्ब पुग्नेछ ।
त्यस्तै प्रभु महालक्ष्मी लाइफ इन्स्योरेन्स कम्पनीले पूँजी वृद्धिका लागि हाल कायम चुक्ता पूँजीको १७ प्रतिशत हकप्रद शेयर निष्कासन गर्न सेबोनमा दिइसकेको छ । हाल कम्पनीको चुक्ता पूँजी रू. ४ अर्ब २९ करोडभन्दा बढी छ । हकप्रद शेयर निष्कासन बाँडफाँटपश्चात उक्त पूँजी रू. ५ अर्ब २ करोडभन्दा बढी पुग्नेछ ।
त्यस्तै सन नेपाल लाइफ इन्स्योरेन्स कम्पनीले २३ दशमलव ८ प्रतिशत बोनस शेयर वितरणपछि कायम चुक्ता पूँजीको २७ प्रतिशत हकप्रद शेयर निष्कासन गर्ने निर्णय गरेको छ । हाल यस कम्पनीको चुक्ता पूँजी रू. ३ अर्ब २० करोड छ । प्रस्तावित बोनस शेयर वितरणपछि कम्पनीको चुक्ता पूँजी रू. ३ अर्ब ९६ करोड १६ लाख पुग्नेछ । त्यसपछि कायम चुक्ता पूँजीको २७ प्रतिशत हकप्रद शेयर निष्कासन बाँडफाँटपछि उक्त पूँजी रू. ५ अर्ब पुग्नेछ ।
एशियन लाइफ इन्स्योरेन्स कम्पनीको चुक्ता पूँजी ७ दशमलव ७५ प्रतिशत बोनस शेयर वितरणपश्चात रू. ३ अर्ब ३९ करोडभन्दा बढी पुगेको छ । उक्त चुक्ता पूँजीको ४२ प्रतिशत हकप्रद शेयर निष्कासन गर्ने प्रस्ताव कम्पनीले साधारण सभाबाट पारित गरिसकेको छ । ४२ प्रतिशत हकप्रद शेयर निष्कासनपछि कम्पनीको चुक्ता पूँजी रू. ४ अर्ब ८२ करोडभन्दा बढी पुग्छ ।
सानिमा जिआईसी इन्स्योरेन्स कम्पनीले पनि हाल कायम चुक्ता पूँजी रू. २ अर्बको २५ प्रतिशत हकप्रद शेयर निष्कासन गर्ने निर्णय गरेको छ । यो हकप्रद शेयर निष्कासन प्रस्ताव पारित गर्नका लागि कम्पनीले चैत २९ गते साधारण सभा बोलाएको छ । हकप्रद शेयर निष्कासनपश्चात कम्पनीको चुक्ता पूँजी रू. २ अर्ब ५० करोड फुग्नेछ ।
त्यस्तै एनएलजी इन्स्योरेन्सले गत आवको मुनाफाबाट ५ दशमलव ५० प्रतिशत बोनस शेयर वितरणपछि कम्पनीको पूँजी रू. १ अर्ब ५३ करोडभन्दा बढी पुगेको छ । कम्पनीले ६६ प्रतिशत हकप्रद शेयर निष्कासन गर्नका लागि सेबोनमा निवेदन दिइसकेको छ । यो हकप्रद शेयर निष्कासन बाँडफाँटपछि पूँजी रू. २ अर्ब ५५ करोड पुग्नेछ ।
निर्जीवनतर्फ नेपाल इन्स्योरेन्स, राष्ट्रिय बीमा कम्पनी, नेको इन्स्योरेन्स र प्रभु इन्स्योरेन्सको चुक्ता पूँजी अझै पुगेको छैन । त्यस्तै जीवन बीमातर्फ सूर्यज्योति लाइफ, सानिमा रिलाइन्स लाइफ, आइएमई लाइफ, रिलाएबल नेपाल लाइफ र सिटीजन नेपाल लाइफ इन्स्योरेन्सको पनि उक्त पूँजी पुगेको छैन ।
