इलाम । इलाममा बाढीपहिरोबाट प्रभावित परिवारलाई रातह वितरण गर्न थालिएको छ । कात्तिक २ र ३ गतेको वर्षाका कारण ज्यान गुमाएका परिवारलाई संघीय सरकारका तर्फवाट राहत वितरण थालिएको हो ।
देउमाई नगरपालिका–४ मा लुतिमाई खोल्सीले बगाउँदा मृत्यु भएकी ४७ वर्षीया सरिता आचार्यको परिवारलाई २ लाख उपलब्ध गराइएको छ । सो घटनामा उनका श्रीमान् दीपक भाग्न सफल भएका थिए ।
पीडित परिवारको घरमै पुगेर प्रमुख जिल्ला अधिकारी ध्रुवबहादुर खड्कासहितको टोलीले सो रकम हस्तान्तरण गरेको हो ।
यस्तै, देउमाई नगरपालिकाका तर्फबाट पीडित परिवारलाई ५० हजार प्रदान गरिएको छ । जिल्लामा बाढीपहिरोबाट १८ जनाले ज्यान गुमाएका थिए ।
मृतक सबैको घरमा पुगेर राहत प्रदान गरिने प्रजिअ खड्काले बताए । बाढीपहिरोबाट फाकफोकथुम गाउँपालिकामा ६, माङसेवुङ गाउँपालिकामा चार, सूर्योदय नगरपालिकामा तीन तथा माई नगरपालिका र देउमाई नगरपालिकामा एक–एक जनाको ज्यान गएको थियो ।
बाढीपहिरोबाट जिल्लामा २८५ परिवार विस्थापित भएका छन् । यस क्रममा पाँच जना घाइते भएका थिए भने ९ जनाको जीवितै उद्दार गरिएको जिल्ला प्रशासन कार्यालयले जनाएको छ ।
बाढीपहिराको कारण ६४४ घरगोठमा क्षति पुगेको छ । १९ परिवारलाई सुरक्षित स्थानमा स्थानान्तरण गर्नुपर्ने अवस्था छ ।
जिल्ला प्रशासन कार्यालयले क्षतिको विवरण सार्वजनिक गरेको छ । जिल्लामा बाढीपहिरोबाट विद्यालयतर्फ १४ करोड ६२ लाख, स्वास्थ्य केन्द्रतर्फ ३ करोड २३ लाख, घर आवासतर्फ ४६ करोड ९६ लाख, पुलपुलेसातर्फ १२ करोड, खानेपानीतर्फ ११ करोड ३५ लाख, सिँचाइमा १९ लाख, नदी कटानतर्फ ८० लाख, विद्युत्तर्फ ९१ लाख, खेलमैदानतर्फ ५ लाख, कृषिबालीतर्फ २३ करोड ९५ लाख, पशुपक्षीतर्फ २ करोड ३० लाख तथा टेलिफोनतर्फ ४ लाख २० हजार बराबरको क्षति भएको जिल्ला प्रशासन कार्यालयले जनाएको छ ।
वर्षाका कारण मेची राजमार्ग क्षेत्रमा मात्र ८ करोड ५८ लाख बरावरको क्षति भएको छ । रासस
