असोज १३, काठमाडौं । नेपाल राष्ट्र बैंकले बुधवार ३० अर्ब रुपैयाँ बराबरको सातदिने रिपो उपकरण जारी गर्ने भएको छ।
बैंकिङ प्रणालीमा लगानीयोग्य रकम (तरलता) को अभाव चुलिंदै गएपछि केन्द्रीय बैंकले सातदिने निक्षेप संकलन तथा रिपो उपकरण जारी गर्ने भएको हो। हाल प्रणालीमा देखिएको तरलता अभावको समस्या समाधानका लागि रिपो उपकरणमार्फत ३० अर्ब रुपैयाँ बजारमा पठाउन लागिएको हो।
यो उपकरणमार्फत बजारमा पठाइने रकम बैंकहरुले पाउने र यसबाट तरलता व्यवस्थापन हुने राष्ट्र बैंकले बताएको छ।
बुधवार नै बोलकबोलमार्फत जारी हुने रिपो आगामी असोज २० गते परिपक्व हुनेछ। बोलकबोलमा क, ख र ग वर्गका बैंक तथा वित्तीय सहभागी हुन पाउनेछन्।
तरलता न्यून हुँदा रिपो जारी गरिन्छ भने अधिक हुँदा रिभर्स रिपो जारी गरिन्छ।
