जेठ १, काठमाडौं । काठमाडौं महानगरपालिकाका मूख्य निर्वाचन अधिकृत राजुकुमार खतिवडाले नोट गनेजस्तो मतगणना गर्न नसकिने बताएका छन्।
राष्ट्रिय सभा गृहमा आइतवार साँझ सञ्चारकर्मीहरुको को प्रश्नको जवाफमा उनले भने, ‘बाकसबाट खन्यायो, अनि नोट गनेजस्तो केही नहेरी गन्ने भएको भए छिटो हुन्थ्यो होला,प्रक्रिया हुन्छ। फेरि प्रश्न उठ्यो भने झन् खराब हुन्छ।’ उनले सोमवार बिहानदेखि सात ओटा टोलीले मतगणना गर्ने पनि बताए।
‘बाहिरबाट हेर्दा राष्ट्रिय सभा गृह ठूलो देखिन्छ। तर हामीलाई उपलब्ध गराइएको स्थान सीमित छ। महानगरपालिको भवन प्रयोग गरिरहेका छौं। नगरपालिकाले खाली भएको कोठा र उपलब्ध गराउन सक्ने स्थान उपलब्ध गराएको छ’, उनले भने, ‘उपलब्ध भएसम्म कोठामा मिलाएर गन्ने काम भइरहेको छ। सातबाट आठ बनाउने स्थान छैन। यो भवनभन्दा बाहिर लगेर गणना गर्न सकिन्न। कानूनले रोक्छ। त्यसलाई पनि हामीले विचार गर्नुपर्ने हुन्छ।’
उनले मतगणना कार्य सजिलो नभएको पनि बताए ।
उनले २०७४ सालमा १५ दिन समय लागेको उल्लेख गर्दै २०७४ को भन्दा अहिले मतपत्र ठूलो रहेको पनि बताए ।
‘जति ठाउँमा गने पनि निर्वाचन अधिकृत उपस्थित हुनुपर्छ। एउटा निर्वाचन अधिकृत कति ठाउँमा एकैचोटि उपस्थित हुनसक्छ’, उनले भने, ‘जमीनमा पनि गन्ने अवस्था हुँदैन। समय लाग्नु स्वाभाविक छ। ’यो छिटो हुनुपर्छ भन्ने चासो लाग्नु स्वभाविक हो’, उनले भने, ‘चासोलाई सम्बोधन गर्दै सकारात्मक रूपमा लिंदै थप व्यवस्थित गर्दै लैजान्छौं।’
महानगरको मतगणना कछुवा गतिमा भइरहेको भन्ने सर्वत्र चासो र चिन्ता व्यक्त गर्न थालिएपछि उनको पछिल्लो भनाइ सार्वजनिक भएको हो ।
बेलुका ८ ४० प्राप्त पछिल्लो मतगणनाको परिणाम अनुसार काठमाडौं महानगरेको मेयर पदका स्वतन्त्र उम्मेदवार बालेन्द्र शाहले ४ हजार १४९ मत पाएका छन् । यसैगरी नेकपा(एमाले)का उम्मेदवार केशव स्थापितले २ हजार १४८ मत पाएका छन् । त्यस्तै नेपाली काँग्रेसका उम्मेदवार सिर्जन सिंहले १ हजार ९३४ मत पाएकी छन् ।
