काठमाडौं । नेपाल आयल निगमले पेट्रोलियम पदार्थको आपूर्ति तथा विक्री वितरणमा अवरोध नगर्न भनेको छ ।
शुक्रवार राती प्रेसविज्ञप्ति जारी गर्दै आयल निगमले पेट्रोलियम व्यवसायीका मागबारे उद्योग वाणिज्य तथा आपूर्ति मन्त्रालयका सहसचिवको संयोजकत्वमा गठित उपसमितिले अध्ययन गरिरहेकाले हाललाई आन्दोलनका सबै कार्यक्रम स्थगित गर्न भनेको हो ।
‘पेट्रोलियम विक्रेता, पेट्रोलियम ढुवानी व्यवसायी महासंघ तथा नेपाल एलपी ग्यास उद्योग संघका मागबारे आवश्यक निर्णय लिने भन्दै आन्दोलनका सम्पूर्ण कार्यक्रमहरू हाललाई स्थगन गरी आम उपभोक्ताहरूले पेट्रोलियम पदार्थहरू सरल र सहज रूपले प्राप्त गर्ने व्यवस्था मिलाउनु हुन अनुरोध गर्दछौँ’, निगमले भनेको छ ।
नेपाल आयल निगम सञ्चालक समितिले पेट्रोलियम विक्रेताले प्रतिशतमा पाउँदै आएको कमिसन स्थगन गरेपछि व्यवसायीहरू आन्दोलित भएका हुन् । निगमले पेट्रोलको मूल्य प्रतिलिटर १४० रुपैयाँसम्म व्यवसायीलाई प्रतिशतमा नै कमिसन दिंदै आएको थियो ।
तर त्यसपछि निगमले पेट्रोलमा मात्रै प्रति लिटर १५ रुपैयाँ मूल्य बढाइसकेको छ । व्यवसायीले पछिल्लो पटक बढाइएको १५ रुपैयाँमा कमिसन पाएका छैनन् ।
