पुस ११, काठमाडौं । साताको पहिलो कारोबार दिन आइतवार नेप्से परिसूचक अघिल्लो कारोबार दिनको तुलनामा ७१ दशलमव २० अंक अर्थात् २ दशमलव ८२ प्रतिशतले वृद्धि भएको छ ।
यो दिन नेप्से परिसूचक २ हजार ५९१ दशमलव ४२ विन्दुमा पुगेको हो ।यो दिन कारोबारमा आएका २३१ ओटा धितोपत्रको ८६ लाख १ हजार ९५६ कित्ता शेयर ६२ हजार २१ पटकमा रू.५ अर्ब १७ करोड ३२ लाख ५०३ मा खरीदविक्री भएको छ ।
यो दिन कारोबारमा आएका ती धितोपत्र मध्ये १८ ओटा कम्पनीको शेयरमूल्यमा सकारात्मक सर्किट लागेको छ । नेशनल लाइफ इन्स्योरेन्स कम्पनी,युनाइटेड इन्स्योरेन्स , एभरेष्ट इन्स्योरेन्स, प्रिमियर इन्स्योरेन्स,प्रुडेन्सियल इन्स्योरेन्स,लुम्बिनी जनरल इन्स्योरेन्स,एशियन लाइफ इन्स्योरेन्स,प्राइम लाइफ इन्स्योरेन्स,गुँरास लाइफ इन्स्योरेन्स,रिलायन्स लाइफ इन्स्योरेन्स,प्रभु लाइफ इन्स्योरेन्स,ज्योति लाइफ इन्स्योरेन्स,सानिमा लाइफ इन्स्योरेन्स र मध्यभोटेकोशी जलविद्युत् कम्पनीको शेयरमूल्य अघिल्लो कारोबार दिनको तुलनामा १० प्रतिशका दरले वृद्धि भएसँगै सकारात्मक सर्किट लागेको हो ।
त्यसैगरी जनरल इन्स्योरेन्स,सूर्या लाइफ इन्स्योरेन्स र एनएलजी इन्स्योरेन्स कम्पनीको शेयरमूल्य अघिल्लो कारोबार दिनको तुलनामा ९ दशलमव ९९ प्रतिशतका दरले वृद्धि भएसँगै सकारात्मक सर्किट लागेको हो ।
यो दिन सबैभन्दा बढी गोर्खाज फाइनान्सका शेयरधनीले गुमाएका छन् । कम्पनीको शेयरमूल्य अघिल्लो कारोबार दिनको तुलनामा ५ दशमलव ५७ प्रतिशतका दरले घटेको छ । यो दिन कम्पनीको शेयरमूल्य प्रतिकित्ता रू. ७९७ मा झरेको छ ।
यस्तै यो दिन सर्वाधिक शेयर खरीदविक्री नबिल बैंकको भएको छ । उक्त कम्पनीको रू. ३२ करोड ७ लाख बराबरको शेयर खरीदविक्री भएको छ । कम्पनीको शेयरमूल्य प्रतिकित्ता रू. १ हजार ५२४ पुगेको छ । दोस्रोमा हिमालयन डिष्टीलरीको रू. २६ करोड ६६ लाख ५२ हजार बराबरको शेयर खरीदविक्री भएको छ ।
यो दिन कारोबारमा आएका १३ ओटा समूहगत परिसूचकमध्ये हाइड्रोपावर समूहको परिसूचक शून्य दशलमव १२ प्रतिशत र वित्त समूहको परिसूचक १ दशमलव १२ प्रतिशत घटेको छ भने बाँकी सबै समूहको परिसूचक बढेको छ ।
सबैभन्दा बढी जीवन बीमा समूहको परिसूचक ९ दशमलव ७८ प्रतिशत र निर्जीवन बीमा समूहको परिसूचक ८ दशमलव १७ प्रतिशतले वृद्धि भएको छ । अघिकांश बीमा कम्पनीहरुको शेयरमूल्यमा वृद्धि भएसँगै बीमा समूहको समूहगत सूचक पनि बढेको छ ।
लामो समयदेखि बीमा कम्पनीहरुको शेयरमूल्य बढेको थिएन । बजार घटेका बेला उक्त समूहका कम्पनीहरुको शेयरमूल्य निकै सस्तिएको थियो ।सोही कारणले गर्दा पनि शेयरमूल्य सस्तिएको बेला खरीदकर्ता आकर्षित भएको देखिन्छ ।
यो दिन बैंकिङ समूहको परिसूचक १ दशमलव १९ प्रतिशत,व्यापार समूहको शून्य दशमलव ८ प्रतिशत ,होटल एण्ड टुरिजम समूहको १ दशमलव ६१ प्रतिशत,विकास बैंक समूहको १ दशमलव १८ प्रतिशत,उत्पादन तथा प्रशोधन समूहको ५ दशमलव ५३ प्रतिशतले वृद्धि भएको छ ।
यस्तै अन्य समूहको २ दशमलव ५६ प्रतिशत,लघुवित्त समूहको ३ दशमलव ५६ प्रतिशत,म्युचुअल फण्ड समूहको शून्य दशलमव ७१ प्रतिशत र लगानी समूहको परिसुचक ३ दशमलव शून्य १ प्रतिशतका दरले वृद्धि भएको छ ।
