पर्ख र हेरको अवस्थामा लगानीकर्ता : ५ अंक बढेर नेप्से परिसूचक २३७६.१७ विन्दुमा

वैशाख १४, काठमाडौं । साताको चौथो कारोबार दिन बुधवार नेप्से परिसूचक ५ दशमलव १७ अंक बढेको छ ।  परिसूचक २ हजार ३७६ दशमलव १७ विन्दुमा कायम भएको छ । यस अवधिमा कारोबारमा आएका २२८ धितोपत्रको २८ लाख ८५ हजार ३९ कित्ता शेयरको २३ हजार ५३४ पटकमा रू. १ अर्ब ८ करोड ९९ लाख ९२ हजार ३५ बराबरको शेयर खरीदविक्री भएको छ । बजार घटेर तल्लो विन्दुमा आएको छ । अधिकांश कम्पनीहरुको शेयरमूल्य तल्लो विन्दुमा आएको छ । सोही कारण अब बिस्तारै खरीदकर्ता आउने देखिन्छ ।  यद्धपि बजारमा तरलता अभाव कायमै छ, सधै बजार घटिरहने पनि होइन, बजार घट्दा होस् या बढ्दा होस् लगानीकर्ताले विवेक पूर्ण रुपमा धेरै अध्ययन गरेर लगानी गरेकोमा प्रतिफल प्राप्त हुने देखिन्छ ।  चुनावी माहोल पनि शुरु हुँदैछ यसले गर्दा बजारमा सकारात्मक प्रभाव पर्ने शेयर विश्लेषक बताउँछन् । पछिल्लो समय लगानीकर्ता पर्ख र हेरको अवस्थामा रहेका छन् । बजार बढ्छ नै भनेर बढी मूल्य शेयर खरीद गर्न पनि राजी छैनन् भने सस्तो मूल्यमा शेयर बेच्न पनि सकेको छैनन् ।  कारोबारमा आएका २२८ धितोपत्रमध्ये जाल्पा सामुदायिक लघुवित्त वित्तीय संस्थाको शेयर मूल्यमा सकारात्मक सर्किट लागेको छ । कम्पनीको शेयर मूल्य अघिल्लो कारोबार दिनको तुलनामा १० प्रतिशत वृद्धि भएसँगै सकारात्मक सर्किट लागेको हो । त्यसैगरी दोस्रोमा नेपाल फाइनान्सको शेयरमूल्य ६ दशमलव ८२ प्रतिशत बढेर रू. ५०१ पुगेको छ । त्यसैगरी बुधवार सानिमा इक्वीटी फण्डको इकाई मूल्य ३ दशमलव ८८ प्रतिशत घटेर रू. १२ दशमलव ८७ कायम भएको छ । त्यसैगरी दोस्रोमा सानिमा लार्ज क्याप फण्डको इकाई मूल्य ३ दशमलव ३७ प्रतिशत घटेर रू. ८ दशमलव ५९ कायम भएको छ ।  बुधवार सर्वाधिक शेयर खरीदविक्री अरुण भ्याली हाइड्रोपावर कम्पनीको भएको हो । कम्पनीको रू. ५ करोड २१ लाख बराबरको शेयर खरीदविक्री भएको छ । शेयर मूल्य प्रतिकित्ता रू. ४२२ कायम भएको हो । त्यसैगरी सर्वाधिक शेयर खरीदविक्री हुने दोस्रोमा हिमालयन डिष्टीलरी लिमिटेडको रू. ३ करोड ८० लाख बराबरको शेयर खरीदविक्री भएको छ । कारोबारमा आएका १३ समूहगत परिसूचकमध्ये बैंकिङ समूहको परिसूचक शून्य दशलमव १८ प्रतिशत, व्यापार समूहको शून्य दशलमव २५ प्रतिशत, लघुवित्त समूहको शून्य दशमलव शून्य ७ प्रतिशत र म्युचुअल फण्ड समूहको परिसूचक शून्य दशमलव ६५ प्रतिशतका दरले घटेको छ भने बाँकी सबै समूहगत परिसूचक बढेसँगै नेप्से परिसूचक बढेको हो ।  समूहगत परिसूचक बढ्नेमा होटल एण्ड टुरिजम समूहको १ दशमलव १९ प्रतिशत, विकास बैंक समूहको १ दशमलव २ प्रतिशत, हाइड्रोपावर समूहको दशमलव ५२ प्रतिशत, वित्त समूहको शून्य दशमलव २ प्रतिशत, निर्जीवन बीमा समूहको शून्य दशमलव २९ प्रतिशत, उत्पादन तथा प्रशोधन समूहको शून्य दशमलव ४ प्रतिशत, अन्य समूहको शून्य दशमलव ६२ प्रतिशत र लगानी समूहको समूहगत परिसूचक शून्य दशमलव ३८ प्रतिशतका दरले बढेको हो ।