दमौली । तनहुँको शुक्लागण्डकी नगरपालिका–१० साँखेमा प्रधान कार्यालय रहेको शुक्ला कृषि पर्यटन सहकारी संस्थाले दुग्ध प्रशोधन केन्द्र सञ्चालन गर्ने भएको छ । कृषकले उत्पादन गरेको दूधलाई बजारीकरणमा सहयोग पु¥याउन सहकारी संस्थाले शुक्लागण्डकी–२ गाछेपानीमा प्रशोधन केन्द्र सञ्चालन गर्न लागेको हो ।
दुग्ध प्रशोधन केन्द्र सञ्चालन गर्न कृषि तथा पशुपङ्छी विकास मन्त्रालय अन्तर्गतको नेपाल लाइभस्टक सेक्टर इनोभेसन आयोजना विकेन्द्रीकृत आयोजना सहयोग इकाई पोखरासँग सहकारीले सम्झौता गरेको छ । सहकारीले गाछेपानीमा प्रशोधन केन्द्र निर्माण गर्ने र आगामी साउनसम्म सम्पन्न गरी सञ्चालनमा ल्याउने सहकारीका अध्यक्ष मुक्ति सिग्देलले जानकारी दिए । उनका अनुसार ९९ लाख २९ हजार रुपैयाँ लगानीमा प्रशोधन केन्द्र सञ्चालनमा ल्याइनेछ । त्यसका लागि सहकारीले १९ लाख ४० हजार र राष्ट्रिय सहकारी बैंक दमौली शाखाले ३० लाख २४ हजार ऋण लगानी गर्नेछ । नेपाल लाइभस्टक सेक्टर इनोभेसन आयोजना विकेन्द्रीकृत आयोजना सहयोग इकाइले ४९ लाख ६४ हजार रुपैयाँ अनुदान उपलब्ध गराउने सहमति भएको छ । गुणस्तरीय दूध, दही, घ्यु, पनिर, आइसक्रिम बनाउने र प्याकेजिङ गर्नलाई आवश्यक यन्त्र उपकरण प्रशोधन केन्द्रमा जडान हुनेछ । कच्चा पदार्थ खरीद, ढुवानी, बजार प्रवद्र्धन र बीमामा परियोजनाको सहयोग रहने सहकारीले बताएको छ ।
शुक्लागण्डकी–१० साँखेमा प्रधान कार्यालय रहेको शुक्ला कृषि पर्यटन सहकारीले दुलेगौडाबाट सेवा कार्यालय सञ्चालन गरेको छ । रासस
