विराटनगर। विराटनगर महानगरपालिका र अमेरिकाको न्यूयोर्क महानगरबीच भगिनी सम्बन्ध कायम हुने भएको छ । त्यसका लागि दुवै महानगरका मेयरबीच न्यूयोर्कमा छलफल भएको छ । भगिनीसम्बन्ध स्थापित भएपछि दुवै महानगरबीच सहयोग आदानप्रदान हुने बताइएको छ ।
अमेरिका भ्रमणमा रहेका विराटनगर महानगरपालिकाका मेयर नागेश कोइराला र न्यूयोर्कका मेयर एडम्सबीच शुक्रवार भएको भेटवार्तामा दुवै नगरबीच भगिनीसम्बन्ध स्थापित गर्न छलफल भएको थियो । मेयर कोइरालाले न्यूयोर्कका मेयर एडम्सलाई उपहार स्वरूप नेपाली दौरासुरुवाल र ढाका टोपी प्रदान गरेका थिए । मेयर कोइरालाले मेयर एडम्सलाई विराटनगर भ्रमणको निम्तो दिँदै नेपाल भाषा, कला, संस्कृतिमा सम्पन्न रहेको जानकारी गराएका थिए । मेयर कोइरालाले अमेरिकी नागरिक साहसिक खेलमा रमाउने भएकाले नेपाल साहसिक पर्यटनका लागि उपयुक्त रहेकोे बताएका थिए । प्रदेशको एकमात्रै महानगरपालिका विराटनगरबाट सगरमाथा सहितका हिमाल नजिक पर्ने भएकाले विराटनगरबाटै माउण्टेन फ्लाइटको पहल पनि भइरहेको मेयर कोइरालाले जानकारी दिएका थिए । एडम्सले छिट्टै नेपाल आउन चाहेको इच्छा व्यक्त गरेका थिए । विगतमा पनि नेपाल आएको र आफूलाई मन पर्ने देशमध्ये नेपाल एक भएको मेयर एडम्सले बताए ।