लुम्बिनी प्रदेशअन्तर्गत धान उत्पादन हुने तराईका जिल्लामा अहिले खेत बाँझै छन् । लामो सुक्खाले रोपो सुकेको छ । पानी अभावमा खेतमा धाँजा फाटेका छन् । जमिनमुनिको पानी तानेर फाटफुट रोपाइँ गरिएको छ । धेरै जमिनमा अहिले फुंग धूलो उड्छ । किसान बाँझो खेत हेरेर टोलाउन बाध्य छन् । रासायनिक मल अभावले पिरोलिएका किसानलाई वर्षा नहुँदा झन् मर्का परेको छ । प्रकृति अनुकूल नभएपछि किसान आफ्नै भाग्यलाई धिक्कार्न बाध्य छन् ।
