तेलको भाउ घटाउन बाइडेनले अमेरिकी रिजर्भ खुलाउने

लगातार चौथो महीना पनि ओरालोमा कच्चा तेलको भाउ

काठमाडौं । विश्व बजारमा कच्चा तेलको भाउ लगातार घटिरहेको छ । फेब्रुअरीमा पनि त्यो क्रम रोकिएको छैन । इन्भेस्टिङडटकमका अनुसार गत नाेभेम्बरमा प्रतिब्यारेल ८८ दशमलव ३७ डलर रहेकाे कच्चा तेलको भाउ साे महीनाको अन्त्यमा ८० दशमलव ५६ डलरमा झरेको थियो । त्यसको एक महीनापछि डिसेम्बरको अन्त्यमा कच्चा तेलको मूल्य भने झिनो अंकमा घटेर ८० दशमलव ४७ डलर कायम भएको थियो । जनवरीमा पनि भाउ घट्ने क्रम रोकिएन । जनवरीको अन्त्यमा यसको मूल्य ७८ दशमलव ८७ डलर कायम हुँदा फेब्रुअरीको अन्तिम दिन कच्चा तेलको भाउ प्रतिब्यारेल ७६ दशमलव ९० कायम भएको छ । लगानीकर्ता हतोत्साहित हुँदा कच्चा तेलको लगातार भाउ घटिरहेको छ । अमेरिकाले महँगी नियन्त्रण गर्न मौद्रिक नीति कसिलो बनाउँदा लगानीकर्ताहरू चिन्तामा छन् । सबैभन्दा धेरै कच्चा तेल आयातकर्ता चीनले कोभिडका कारण लगाएको सबै प्रतिबन्धहरू खारेज गरेपछि त्यहाँ तेलको माग बढ्ने आशा गरिएको भए पनि अमेरिकामा कच्चा तेलको सञ्चिति बढेको खबरले लगानीकर्ताहरू हतोत्साहित भएका हुन् । यसले गर्दा बजारमा दबाब देखिएको छ । मंगलवारको कारोबारमा अमेरिकी बेञ्चमार्क वेष्ट टेक्सस इन्टरमिडियट (डब्ल्यूटीआइ)को भाउ प्रतिब्यारेल १ प्रतिशतले बढेर ७६ डलर ४६ सेन्टमा पुगेको थियो । आजको कारोबारमा भाउ बढेको भए पनि यो महीनाभर डब्ल्यूटीआई झन्डै ४ प्रतिशतले घट्ने क्रममा छ । मंगलवारको कारोबारमा तेलको अन्तरराष्ट्रिय बेञ्चमार्क ब्रेन्ट क्रुडको भाउ पनि शून्य दशमलव ६७ प्रतिशतले बढेर प्रतिब्यारेल ८२ डलर ८१ सेन्टमा पुगेको थियो । फेडले व्यापक ब्याजदर वृद्धि गर्दा पनि अमेरिकामा महँगी टसको मस नभएको तथ्यांकले ब्याजदर वृद्धि जारी रहने अनुमान बलियो हुँदा कच्चा तेलमाथि दबाब बढेको छ । डलरको भाउमा भएको वृद्धिले पनि डलरमा किनबेच हुने कमोडिटीलाई घाटा भइरहेको छ । अमेरिकामा कच्चा तेलको भन्डार बढिरहेको खबरले पनि तेलको भाउ घटेको छ । अहिले अमेरिकाको कच्चा तेल भन्डारण सन् २०२१ को मेयताकै उचाइमा उक्लिएको छ । चीनले कोभिड विरुद्धको शून्य सहनशीलताको नीति खारेज गर्दै वर्षको अन्त्यतिर सीमा खुलाएको अनि तेलको माग बढ्ने संकेत देखिए पनि यसको भाउ यो वर्ष सुस्ताएको छ । यो वर्षको उत्तरार्द्धमा विश्वव्यापी तेलको माग कीर्तिमानी स्तरमा उक्लिन सक्ने एउटा अनुमान देखाएको छ । यो वर्षको अहिलेसम्म तेलको भाउ रातोमै रहेपछि बैंकहरूले तेलको मूल्य प्रक्षेपण घटाउन थालेका छन् ।

Aarthik Abhiyan माघ २०७९

बढ्यो कच्चा तेलको भाउ, यस्तो छ कारण

काठमाडौं । अन्तरराष्ट्रिय बजारमा मंगलवार कच्चा तेलको भाउ बढेको छ । मंगलबार लगातार दोस्रो दिन पनि कच्चा तेलको भाउमा हरियाली देखिएको छ । चीनको तेल मागमा आएको सुधार र टर्कीमा हालै गएको विनाशकारी महाभूकम्पपछि मुख्य निर्यात टर्मिनल बन्द भएर आपूर्ति अभाव भइरहँदा तेलको भाउ बढेको हो । उक्त दिनको कारोबारमा कच्चा तेलको अमेरिकी र अन्तरराष्ट्रिय दुवै बेञ्चमार्क उकालो लागेका छन् । लन्डनस्थित आईसीई एक्सचेञ्जको कोमेक्स डिभिजनमा मंगलबार ८ जीएमटीतिर ब्रेन्ट क्रुडको भाउ २ दशमलव १५ प्रतिशतले बढेर प्रतिब्यारेल ८२ डलर ७३ सेन्टमा पुगेको छ । यो अघिल्लो दिन बजार बन्द हुँदाको तुलनामा १ डलर ४ सेन्ट धेरै हो । सोही समयमा न्यूयोर्क मर्कन्टाइल एक्सचेञ्जको कोमेक्स डिभिजनमा अमेरिकी बेञ्चमार्क वेष्ट टेक्सस इन्टरमिडियट (डब्ल्यूटीआई)को भाउ २ दशमलव २ प्रतिशतको वृद्धिसहित प्रतिब्यारेल ७५ डलर ८१ सेन्टमा उक्लिएको थियो । यो अघिल्लो दिन बजार बन्द हुँदाको भन्दा १ डलर ७० सेन्ट धेरै हो । यो समाचार तयार पार्दाखेरि नेपाली समयअनुसार ३ः४५ बजेतिर ब्रेन्ट क्रुडको भाउ प्रतिब्यारेल ८२ डलर १९ सेन्टमा किनबेच भइरहेको थियो । सोही समयमा डब्ल्यूटीआईको भाउ पनि ७५ डलर ४२ सेन्ट कायम भयो । चीनको आर्थिक गतिविधिमा पुनःबहाली आउने आशा र टर्कीको महाभुकम्पका कारण आपूर्ति अवरोधका कारण तेलको भाउले टेवा पाएको बजार अनुसन्धान संस्था ओएन्डाका विश्लेषक इडवर्ड मोयाले भने । यो वर्ष विश्वको कुल तेलको माग वृद्धिमध्ये आधा चीनबाट हुने अन्तरराष्ट्रिय ऊर्जा निकाय (आईईए)को अनुमान छ । विश्वको सबैभन्दा ठूलो कच्चा तेल निर्यातकर्ता साउदी अरबले ६ महीनामा पहिलो पटक एशियाली बजारका लागि साउदी बेञ्चमार्कको भाउ बढाएको छ । विशेषतः चीनको मागमा सुधारको आशामा तेलको भाउ बढाइएको हो । भूकम्पपछि टर्कीमा दैनिक १० लाख ब्यारेल तेल निर्यात हुने बीटीसी टर्मिनल बन्द भएको छ । लगानीकर्ताहरू अमेरिकी केन्द्रीय बैंक फेडरल रिजर्चका अध्यक्ष जेरोम पावेलको बुधवार भाषणको पखाईमा रहँदा भने तेलको भाउ धेरै बढ्न सकेन । एजेन्सी

Aarthik Abhiyan पौष २०७९

शान्ति हुने आशा, अमेरिकी ट्रेजरीको प्रतिफल बढ्दा सोमवार घट्यो विश्व बजारमा तेलको भाउ

Aarthik Abhiyan फाल्गुन २०७८

तेलको भाउ ७६ डलरभन्दा तल स्थिर

मंसिर २२, लन्डन (बेलायत) । अन्तरराष्ट्रिय बजारमा कच्चा तेलको भाउ ७६ डलर भन्दा तल स्थिर रहेको छ । कोरोना भाइरसको ओमिक्रोन भ्यारिएन्टले विश्व अर्थतन्त्र र इन्धनको मागमा पार्ने प्रभावबारे लगानीकर्ताहरुले आँकलन गरिरहँदा बुधवार भाउ स्थिर रहेको हो । बिहानी कारोबार प्रतिब्यारेल १ डलरभन्दा धेरैले घटेपछि मध्याहन्नतिर भने ब्रेन्ट क्रुडको भाउ ३२ सेन्ट अर्थात् शून्य दशमलव ४ प्रतिशतले बढेर ७५ डलर ७६ सेन्टमा आएको थियो । अमेरिकी बेञ्चमार्क वेष्ट टेक्सस इन्टरमिडियटको भाउ पनि १२ सेन्ट अर्थात् शून्य दशमलव २ प्रतिशतले बढेर प्रतिब्यारेल ७२ डलर १७ सेन्टमा आएको थियो । बुधवार बिहानी कारोबारमा यो प्रतिब्यारेल ७१ डलरभन्दा तल रहेको थियो । नोभेम्बर २५ यता १६ प्रतिशतले घटेर ब्रन्टको भाउ ६९ डलरभन्दा तल आएको थियो । डिसेम्बर १ यता भने ओमिक्रोनले तेलको मागमा सीमित मात्रै प्रभाव पारेको संकेत पछि यसको भाउ ८ प्रतिशतभन्दा धेरैले बढेको छ । एजेन्सी

Aarthik Abhiyan कार्तिक २०७८

तेलको भाउ १५० डलरमा पुग्ने अनुमान

मंसिर १५, लन्डन (बेलायत) । अन्तरराष्ट्रिय बजारमा कच्चा तेलको भाउ प्रतिब्यारेल पुग्ने अनुमान गरिएको छ । अमेरिकी बहुराष्ट्रिय स्वतन्त्र लगानी बैंक जेफ्रीज ग्रुपका इक्विटी स्ट्राटेजीका ग्लोबल हेड क्रिस्टोफर वूडले बुधवार सीएनबीसीसँगको कुराकानीमा यस्तो बताएका हुन् ।कोरोना भाइरसको संक्रमणका कारण बन्द रहेको सारा विश्व पुनः खुल्यो भने भाउमा उल्लेख्य वृद्धि हुन सक्ने उनको भनाइ छ । अधिकांश एशिया बन्द भएको बेलामा पनि तेलको भाउ प्रतिब्यारेल ८० माथि जान सक्यो । चीनको सीमा प्रभावकारी रुपमा अझै बन्द छ ।‘आपूर्तिमा समस्या नाटकीय रहेकोले विश्व साँच्चै नै पूरा खुल्यो भने भाउ १५० डलरसम्म जान सक्छ,’ उनले भने । आफ्नो लागि समस्या तेलको भाउ नभएर महामारी भएको पनि उनले बताएका छन् । हालका वर्षहरुमा खनिज इन्धनमाथिको राजनीतिक आक्रमणका कारण ऊर्जाको क्षेत्रमा लगानीका लागि प्रोत्साहन हटाइएको छ । तर गत वर्ष विश्वको ऊर्जा मागमध्ये ८४ प्रतिशत माग खनिज इन्धनबाटै पूर्ति भएको उनले औंल्याएका छन् । अहिले तेलमा कसैले लगानी नगरेको तर जैविक इन्धनको खपत भने भइरहेकोले विश्व पूरा खुलेपछि तेलको भाउ निकै माथि जाने र यसले महँगी डरलाग्दो गरी बढाउने वूडको भनाइ छ ।हालैका दिनमा भने विश्व बजारमा तेलको भाउ घटेको छ । बुधवार बिहान एशियाली कारोबारमा ब्रेन्ट क्रुडको भाउ प्रतिब्यारेल ७१ डलर ९ सेन्ट रहेको थियो । अमेरिकी बेञ्चमार्क यूएस क्रुडको भाउ पनि प्रतिब्यारेल ६८ डलर ५ सेन्ट आसपास थियो । विश्व स्वास्थ्य संगठनले कोभिडको नयाँ भ्यारिएन्ट ओमिक्रोनबारे चेतावनी दिएपछि शुक्रवार तेलको भाउका लागि यस वर्षकै खराब दिन बनेको थियो । त्यसयता तेलको भाउमा तीव्र उतारचढाव आइरहेको छ । एजेन्सी

Aarthik Abhiyan कार्तिक २०७८

तेलको भाउ घट्ने क्रम जारी

कात्तिक २५, न्यूयोर्क (अमेरिका) । अन्तरराष्ट्रिय बजारमा कच्चा तेलको भाउ घट्ने क्रमले बिहीवार पनि निरन्तरता पाएको छ । अमेरिकामा मुद्रास्फीति बढिरहेको चिन्ताबीच तेल बजार दबाबमा आएको हो । पेट्रोलियम निर्यातकर्ता देशहरुको संगठन (ओपेक)ले ऊर्जाको उच्च मूल्यतर्फ औंल्याउँदै तेलको माग प्रक्षेपण घटाउँदा पनि तेल बजार दबाबमा आएको हो । लन्डन स्थित आईसीई एक्सचेञ्जको कोमेक्स डिभिजनमा बिहीवार प्रतिब्यारेल ब्रेन्ट क्रुडको भाउ १३:४३ जीएमटीतिर शन्ूय दशमलव ६३ प्रतिशतले घटेर ८२ डलर १२ सेन्टमा आएको थियो । बिहानी कारोबार भने यसको भाउ बढेर प्रतिब्यारेल ८३ डलर ३७ सेन्टसम्म उक्लिएको थियो । उता, अमेरिकी बेञ्चमार्क वेष्ट टेक्सास इन्टरमिडियट (डब्ल्यूटीआई)को भाउ पनि १ प्रतिशतको कमी सहित प्रतिब्यारेल ८० डलर ५१ सेन्टमा आएको थियो । यस वर्षको चौथो त्रैमासमा तेलको माग दैनिक ओसत ९ करोड ९४ लाख ९० हजार ब्यारेल रहने ओपेकले आफ्नो पछिल्लो मासिक प्रतिवेदनमा भनेको छ । यो गत महीना गरिएको प्रक्षेपणको तुलनामा ३ लाख ३० हजार ब्यारेल कम हो । ऊर्जाको भाउमा भएको वृद्धिका कारण अक्टोबरमा अमेरिकामा मुद्रास्फीति ६ दशमलव २ प्रतिशतले बढेको बुधवार सार्वजनिक भएको तथ्यांकले देखाएको थियो । यो ३० वर्षयताकै उच्च वृद्धि थियो । यो खबर सार्वजनिक भएपछि बुधवार ब्रेन्ट र डब्ल्यूटीआईको भाउ क्रमशः २ दशमलव ५ प्रतिशत र ३ दशमलव ३ प्रतिशतले घटेका थिए । एजेन्सी

Aarthik Abhiyan आश्विन २०७८

तेलको भाउ २ हप्ताकै न्यून विन्दुमा

कात्तिक ११, लन्डन (बेलायत) । अन्तरराष्ट्रिय बजारमा बिहीवार कच्चा तेलको भाउ घटेर २ हप्ताकै न्यून स्तरमा ओर्लिएको छ । आणविक कार्यक्रमबारे नोभेम्बरको अन्त्यसम्ममा विश्वका शक्ति राष्ट्रहरुसँग कुराकानी भइरहेको भनेर इरानले बताएपछि तेल बजार दबाबमा आएको हो । अमेरिकाको कच्चा तेल सञ्चिति अपेक्षा गरिएभन्दा धेरैले बढेको खबरले पनि तेलको भाउ घटाएको हो । ब्रेन्ट क्रुडको भाउ उक्त २ हप्ताकै न्यून विन्दु प्रतिब्यारेल ८२ डलर ३२ सेन्टमा आएको थियो । अघिल्लो दिनको कारोबारमा पनि ब्रेन्टको भाउ २ दशमलव १ प्रतिशतले घटेको थियो । वेष्ट टेक्सस इन्टरमिडियट (डब्ल्यूटीआई) को भाउ पनि २ हप्ताकै न्यून विन्दु प्रतिब्यारेल ८० डलर ५८ सेन्टसम्म आएको थियो । बुधवार डब्ल्यूटीआईको भाउमा २ दशमलव ४ प्रतिशतको कमी आएको थियो । सन् २०१५ मा भएको परमाणु सम्झौतालाई ब्युताउँन विश्वका छ ओटा शक्ति राष्ट्रहरु आगामी महीनाको अन्त्यदेखि वार्ता शुरु हुने बुधवार इरानको शीर्ष परमाणु वार्ताकार अली बाघेरी कानीले बताएका थिए । सम्झौता ब्यूँतियो भने पूर्व अमेरिकी राष्ट्रपति डोनल्ड ट्रम्पले सन् २०१८ को अन्त्यतिर इरानको तेल निर्यातमा लगाएको कठोर प्रतिबन्ध हट्न सक्नेछ । गत हप्ता अमेरिकाको कच्चा तेल सञ्चिति ४३ लाख ब्यारेलले बढेको अमेरिकी ऊर्जा मन्त्रालयले सार्वजनिक गरेको तथ्यांकले देखाएको छ । यो विश्लेषकहरुले अनुमान गरेको भन्दा दोब्बरभन्दा बढी हो । एजेन्सी

Aarthik Abhiyan आश्विन २०७८

माग सुस्ताउने अनुनमान बीच घट्यो तेलको भाउ

भदौ २२, लन्डन (बेलायत) । अन्तरराष्ट्रिय बजारमा कच्चा तेलको भाउ घटेको छ । साउदी अरबले एशियाका लागि कच्चा तेलको मूल्य घटाएपछि माग सुस्ताउन लागेको हो कि भन्ने आशंका पछि तेलको भाउ प्रभावित भएको हो । तर चीनको आर्थिक तथ्यांक र अमेरिकाको उत्पादनमा अवरोध आएको तथ्यांकले भने भाउ धेरै घट्न दिएन । ब्रेन्ट क्रुडको भाउ प्रतिब्यारेल २७ सेन्ट (शून्यदशमलव ४ प्रतिशत) ले घटेर ७१ डलर ९५ सेन्टमा आएको थियो । सोमवार पनि ब्रेन्टको भाउमा ३९ सेन्टको कमीआएको थियो । वेष्ट टेक्सस इन्टर मिडियटको भाउ पनि ७६ सेन्ट (१ दशमलव १ प्रतिशत) को कमीसहित ६८ डलर ५३ सेन्टमा आयो । साउदी अराम्कोले आइतवार एशियामा विक्री हुने सबै खालको क्रुड आयलका लागि अक्टोर डेलिभरीको आधिकारिक विक्री मूल्य (ओएसपी) प्रतिब्यारेल कम्तिमा एक डलरले घटाएको थियो । मूल्यमा गरिएको यति ठूलो कटौतीले विश्वको शीर्ष तेल आयातकर्ता देशको खपत सुस्ताउने संकेत गरेको छ । यद्यपि चीनको सुदृढ आर्थिक सूचकांक र समुद्री आँधी इदाका कारण अमेरिकी आपूर्तिमा आइरहेको निरन्तर अवरोधले पनि तेलको भाउलाई टेवा मिलेको हो । एजेन्सी

Aarthik Abhiyan श्रावण २०७८

कच्चा तेलको भाउ ७५ डलरमाथि आसपास

असार २१, लन्डन (बेलायत) । अन्तरराट्रिय बजारमा कच्चा तेलको भाउ प्रतिब्यारेल ७५ डलर आसपास रहेको छ । पेट्रोलियम निर्यातकर्ता देशहरुको संगठन ओपेक र समूह बाहिरका प्रमुख तेल उत्पादकहरु अर्थात् ओपेक प्लसबीच तेलको उत्पादनसम्बन्धी नीतिमा गत हप्ता महत्वपूर्ण सम्झौता हुन नसकेपछि तेलको भाउले टेवा पाएको हो । साउदी अरेबिया र संयुक्त अरब इमिरेट्स बीच तनाव बढिरहेकै समयमा सो सम्झौतमा सहमति हुन नसकेको हो । सोमवारको कारोबारमा तेलको भाउमा उतारचढाव कायमै रहेको थियो । यद्यपि यो समाचार तयार पार्दाखेरि नेपाली समयअनुसार साँझ ७ : ४० बजे ब्रेन्ट क्रुडको भाउ प्रतिब्यारेल शून्य दशमलव शून्य १ प्रतिशतले बढी ७६ डलर ६८ सेन्ट कायम भएको थियो । अमेरिकी बेञ्चमार्क वेष्ट टेक्सास इन्टरमिडियटको भाउ पनि प्रतिब्यारेल शून्य दशमलव शून्य ५ प्रतिशतको वृद्धिसहित ७५ डलर १४ सेन्टमा किनबेच भइरहेको थियो । गत हप्ता दुई पटक सम्झौता हुन नसकेपछि ओपेक प्लस पुनः सोमवार भेट्दै छन् । सम्झौता भएन भने तेलको भाउ बढ्ने र आर्थिक पुनःबहालीको क्रम भंग हुने अपेक्षा गरिएको छ । वार्ता असफल भयो भने पनि मूल्य युद्ध चर्किने अनुमान गरिएको छ । यद्यपि मूल्य युद्धको अवस्था सृजना नहुने विश्लेषकहरुले बताएका छन् । बिहीवार पहिलो पटक सम्झौता हुन नसकेपछि ब्रेन्ट क्रुड र यूएस क्रुड दुबैको भाउ २ प्रतिशतभन्दा धेरैले बढेर ७५ डलरमाथि पुगेको थिए । यस स्तरमा तेलको दुबै बेञ्चमार्क सन् २०१८ यता पहिलो पटक उक्लिएका हुन् । शुक्रवारको बैठकमा पनि कुनै ब्रेकथु्र हुन सकेन । सन् २०२१ को पहिलो छ महीनामा तेलको भाउ ४५ प्रतिशतभन्दा धेरैले बढिसकेको छ । एजेन्सी

Aarthik Abhiyan जेष्ठ २०७८

तेलको भाउ २ वर्षकै उच्च विन्दुमा

जेठ १८, लन्डन (बेलायत) । अन्तरराष्ट्रिय बजारमा मंगलवार कच्चा तेलको भाउ बढेर २ वर्षकै उच्च विन्दुमा उक्लिएको छ । आगामी चरणको उत्पादन नीतिबारे छलफल गर्न मंगलवार प्रमुख तेल निर्यातकर्ता देशहरुको संगठन ओपेक र ओपकबाहिरका प्रमुख तेल उत्पादकहरु भिडियो कन्फ्रेन्समार्फत भेट्दै थिए । सो बैठकमा उत्पादन बढाउनेबारे सहमति हुन सक्ने आशामा तेलको भाउ बढेको हो । मंगलवार बिहानी कारोबारमा तेलको अन्तरराष्ट्रिय बेञ्चमार्क ब्रेन्ट क्रुडको भाउ करीब २ दशमलव ७ प्रतिशतले बढेर प्रतिब्यारेल ७१ डलर १५ सेन्टमा पुगेको थियो । ब्रेन्टको भाउ ७० डलरमाथि पुगेको यो मार्चयता पहिलो पटक हो । अमेरिकी बेञ्चमार्क वेष्ट टेक्सस इन्टरमिडियट (डब्ल्यूटीआई) को भाउ पनि ३ प्रतिशतभन्दा धेरैले बढेर प्रतिब्यारेल ६८ डलर ६१ सेन्टमा पुगेको छ । यो २ वर्षभन्दा बढी समययताकै उच्च हो । यस वर्षको अहिलेसम्मको अवधिमा तेलको भाउ ३० प्रतिशतभन्दा धेरैले बढिसकेको छ । दुबै क्रुड फयूचर यस अघि सन् २०१९ मा मात्रै यो स्तरमा आएको थियो । एजेन्सी

Aarthik Abhiyan बैशाख २०७८

तेलको भाउ घटाउन बाइडेनले अमेरिकी रिजर्भ खुलाउने

सम्बन्धित सामग्री