विराटनगर (अस) । मोरङ व्यापार संघका निवर्तमान अध्यक्ष प्रकाश मुन्दडासहितको उद्योगी तथा व्यवसायीको टोलीले आइतबार पूर्वप्रधानन्त्री तथा एमाओवादी अध्यक्ष पुष्पकमल दाहाल र अर्थमन्त्री जनार्दन शर्मासमक्ष ब्याजदर घटाउन र तरलता अभाव हुन नदिने उपायसहितको कदम चाल्न ज्ञापनपत्र बुझाएको छ । उद्योगी, व्यवसायीको टोलीले विराटनगरमा अर्थमन्त्री शर्मा र पूर्वप्रधानमन्त्री प्रचण्डलाई भेटेर ज्ञापनपत्र बुझाएको हो ।
निवर्तमान अध्यक्ष मुन्दडाले मुलुकको आर्थिक मेरुदण्ड निजी क्षेत्रका उद्योग, व्यवसायले हाल बढ्दो ब्याजदरको मार खेप्नुका साथै विभिन्न कारणले पुँजी अभावको अवस्था सिर्जना भएबाट उद्योग, व्यवसाय धराशयी हुने सम्भावना बढेकोतर्फ ध्यानाकर्षण गराए । मुलुकको स्वदेशी लगानी, रोजगारी, उत्पादकत्वसहित समग्र अर्थतन्त्र नै धरापमा पर्न जाने जोखिमपूर्ण स्थिति आउन नदिन उनले नेताद्वयलाई आग्रह गरे ।
मुन्दडाले बैंकहरुले हाल संस्थागत निक्षेपमा १० प्रतिशतसम्म ब्याजदर कायम गरेको र आगामी चैतमा बैंक ब्याजदर ११ प्रतिशतसम्म पुग्न सक्ने सम्भावना देखिएकाले हालका लागि संस्थागत निक्षेपमा अधिकतम ६ प्रतिशत बैंक ब्याजदर कायम गराउन र तरलता अभाव समस्या न्यूनीकरणका लागि सम्बन्धित निकायलाई तत्काल कदम चाल्न पहल गरिदिन अर्थमन्त्री शर्मा र पूर्वप्रधानमन्त्री प्रचण्डसमक्ष आग्रह गरे । कार्यक्रममा पूर्वअध्यक्ष महेश जाजू, पूर्वअध्यक्ष पवनकुमार सारडा, उपाध्यक्ष (उद्योग) विकासकुमार बेगवानी, कार्यकारी सदस्य दिपेश सुवेदी, अमित सारडा, पवन राठी, देवाशीष गोल्छा, सुशील सुराना र गोपाल अग्रवाल उपस्थित थिए ।
