जेठ १९, चितवन । यातायात व्यवस्था सेवा कार्यालय चितवनले चालू आर्थिक बर्ष ०७८/७९ मा ६४ करोड बढी राजस्व संकलन गरेको छ । कार्यालयका अनुसार चालू आवको ०७८/७९को साउनदेखि वैशाखसम्म कुल ६४ करोड ३५ लाख ४४ हजार ६२५ रुपैयाँ आम्दानी गरेको हो ।
कार्यालयले यातायात क्षेत्रको आम्दानी, प्रशासनिक दण्ड जरिवाना, सवारी साधन कर, सवारी दस्तुर र आयकर शीर्षकबाट आम्दानी गर्दै आएको छ ।
सबैभन्दा बढी राजस्व संकलन चैतमा
कार्यालयले सबै शीर्षक गरी चालू आवको साउनदेखि वैशाख महीनाको अवधिमा सबैभन्दा बढी राजस्व संकलन चैत महीनामा गरेको छ भने कम वैशाखमा गरेको छ ।
जसअनुसार चैत महीनामा ८ करोड ७६ लाख ४४ हजार २२ रुपैयाँ राजस्व संकलन भएको थियो भने वैशाख महीनामा ३ करोड ५७ लाख ५१ हजार २६० रुपैयाँ राजस्व संकलन भएको छ ।
कार्यालयले साउन महीनामा ७ करोड ८२ लाख ५३ हजार ३८० रुपैयाँ, भदौ महीनामा ४ करोड ५४ लाख ४६ हजार ४६६ रुपैयाँ, असोज महीनामा ६ करोड ३५ लाख ८७ हजार ९८४ रुपैयाँ, कार्तिक महीनामा ६ करोड ७६ लाख ९६ हजार ४९८ रुपैयाँ संकलन गरेको छ ।
यसैगरी कार्यालयले मंसिर महीनामा ७ करोड २१ लाख ९९ हजार ८५४ रुपैयाँ, पुसमा ७ करोड २० लाख ३४ हजार ६६२ रुपैयाँ, माघ महीनामा ५ करोड ९१ लाख १२ हजार ४७८ र फागुन महीनामा ६ करोड १८ लाख १८ हजार २१ रुपैयाँ राजस्व संकलन गरेको हो ।
कार्यालयका प्रमुख विनोद पौडेलले जुनसुकै महीनामा सवारी दर्ता गरेपनि त्यसको जरीवाना नलाग्ने र नवीकरण गर्ने अन्तिम म्याद चैत्र मसान्तसम्म भएकोले चैत्र महीनामा अन्य महीनाभन्दा बढी राजस्व संकलन हुने बताए ।
‘वार्षिक सवारी कर तिर्ने अन्तिम म्याद चैत्र मसान्त हो, त्यसले गर्दा चैतमा बढी हुन्छ, उनले भने, वैशाख महीनामा तिर्नुपर्ने सेवाग्राहीले पनि अग्रिम चैत महीनामा नै तिर्ने हुनाले वैशाखमा राजस्व संकलन कम देखिएको हो ।’
यो चालू आवमा कार्यालय नियमित खुलेको कारणले १० महीनामानै लक्ष्य भेट्न लागेको पौडेलको भनाइ छ । ‘अघिल्ला वर्षहरुमा कोभिडले गर्दा कार्यालय नियमित खुल्न पाएन, अहिले अघिल्ला वर्षमा नवीकरण गर्नुपर्ने सेवाग्राही पनि थपिएका छन् ।
सेवा विस्तार पनि भएको छ । सवारीसाधनको संख्या पनि हरेक वर्ष बढेको छ ।’ उनले भने । कार्यालयले यो आवको असार मसान्तसम्म ६५ करोड राजस्व संकलन गर्ने लक्ष्य लिएको थियो तर दुई महीनाअघि वैशाख महीनामै लक्ष्य बराबरको राजस्व संकलन गर्न सकेको हो ।
नयाँ आर्थिक वर्षबाट नयाँ सवारी लाईसेन्स वितरण गरिने
कार्यालयले नयाँ चालक अनुमतिपत्र नयांँ आर्थिक वर्ष ०७९/८० को साउन महीनाबाट शुरु गरिने जानकारी दिएको छ । कार्यालयका प्रमुख पौडेलले यसको लागि प्रक्रिया शुरु भइसकेको र निजी ट्रायल सेन्टरको बीड प्रक्रिया अघि बढेको जानकारी दिए ।
‘अहिले ट्रायल सेन्टरको लागि बीड आह्वान प्रक्रिया गरेर अघि बढेका छौं उनले भने, संभवत आउँदो साउनबाट नयाँ सवारी चालक अनुमति यहीबाट प्राप्त हुन्छ ।’ हाल ६ ओटा ट्रायल सेन्टरले बीड आवेदन दिएका छन् । मन्त्रालयको मापदण्ड पुगेका ट्रायल सेन्टरमध्ये जुन ट्रायल सेन्टरले न्यून बीडमा आवेदन दिएका छन् सोही सेन्टर छनौटमा पर्ने पौडेलले बताए ।